Бұған дейін ЕЭК-тің ресми сайты Үкіметаралық кеңес 2026 жылы Беларуське кіретін 20 мың электромобильді (ЕАЭО СЭҚ ТН коды 8703 80 000 3), Армения мен Қырғызстанның әрқайсысына кіретін 15 мың электромобиль мен гибридті (ЕАЭО СЭҚ ТН коды 8703 80 000 5) кеденде рәсімдеуге жеңілдік бергенін хабарлаған. Ал Қазақстанға берілген биылғы квота таусылып, оны көбейту мүмкін болмады.
ҚР Өнеркәсіп және құрылыс министрлігі Kolesa.kz редакциясына хабарлағандай, Қазақстан бірнеше себепке байланысты 2026 жылға жеңілдік алуға өтініш бермепті:
- Электромобильді елге жеке тұлғалар өзі емес, заңды тұлғалар, делдалдар әкеледі. Олар машинаны Қытайдан тапсырыс беріп, уақытша сақтау қоймасына жеткізіп, кейін Қазақстан аумағында азаматтардың атына рәсімдейді. Осылайша салықтан жалтарып отыр. Импорттаушылар мұндай схеманы әлеуметтік желіде ашық айтып, клиент шақырып жүр.
Редакция атынан заңды тұлғалар электромобиль импортына делдал ретінде ғана қатысып отырмағынын айта кетейік. Кейбір шет мемлекетте жеке тұлға автомобиль сатып алып, оны өз бетінше Қазақстанға жөнелте алмайды. Мысалы, кейінгі кезде электрокар мен гибрид көптеп келіп жатқан Қытайда шетелге машина шығару үшін тиісті лицензиясы бар компания қажет. Әрине, тауарды нақты клиенттің, яғни жеке тұлғаның атына рәсімдесе, көлік құны төмендеп, көпшіліктің электрокар алуға ынтасы артады.
- Квотамен кірген машиналардың басым бөлігі Қазақстанда есепке қойылмаған. Бұл жерде Ұлттық статистика бюросының дерегіне қатысты сұрақ көп. Қазанда елде қанша электромобиль тіркелгені туралы нақты ақпарат жоқ.
- Қазақстан Дүниежүзілік сауда ұйымына кірген кезде қол қойған жеңілдік жөніндегі хаттамаға сәйкес қазір және алдағы жылдары елге электрокарды кедендік рәсімдеу ақысын төлемей әкелуге болады. Ал Беларусь, Қырғызстан және Арменияда мұндай жеңілдік жоқ. Сол себепті бұл елдер уақытша кедендік алымнан босатуды сұрады. Ал қосымша құн салығынан босату мәселесі көтерілмеді.
Министрлік жеке және заңды тұлғалардың елге электрокар әкелуіне шектеу жоқ екенін айтты, бірақ машина кіргізген адам қажет төлемдерден босатылмайды. Демек 2026 жылы жеке тұлға өзі пайдалану үшін электромобиль әкелсе, ДСҰ жеңілдігі бойынша кеденде рәсімдеу үшін шығындалмайды, бірақ 16 % мөлшерінде ҚҚС төлеуге міндеті болады.
Комментариев: 0