Fang Cheng Bao ірі кроссовер жасады

BYD концерні премиум Fang Cheng Bao брендінің топтамасын екіге бөлді: рамалы Bao («Барыс») жол талғамайтын көліктері және көтергіш шанағы бар Tai («Титан») кроссоверлері. Соңғысының флагманы — толық өлшемді Tai 9 гибриді. Қытай Өнеркәсіп министрлігі оның техникалық сипаттамасын 7 тамызда жариялады.

Tai 9-дың өлшемдері — 5270 × 1999 × 1880 мм, дөңгелек базасы — 3130 мм. Ол брендтің флагманы — Bao 8-ден (5195 × 1994 × 1875 мм) ірі. Кроссовер BYD-дің жаңа DMS архитектурасына негізделген және бейімді гидравликалық аспа және артқы дөңгелектері бұрылатын толық басқарылатын шассимен жабдықталған. Автомобиль 255/50 R21, 255/45 R22 немесе 275/45 R22 өлшемді шиналар алады.

Қосылатын гибрид күштік құрылым 203 ат күшін беретін 1.5 литрлік бензинді қозғалтқыш және алдыңғы әрі артқы осьтегі екі электромотордан тұрады. Әрқайсысының қуаты 270 ат күшіне тең. Соның арқасында машина толық жетекті. Салмағы жарты тоннаға жуық литий-темір-фосфатты аккумулятордың сыйымдылығы — 66.48 кВт·сағ. Ол тек электр қуатымен 310 км еңсеруге мүмкіндік береді, жалпы жүріс қоры 1200 шақырымға жетеді.

Үш қатарлы, алты орынды түрленімнің (отбасылық 2-3-2 нұсқасы да шығады) екінші қатарында жеке креслолар тұр. Әр орында климат-бақылау бар. Лидармен жабдықталған God’s Eye автопилотымен тасжолда және қала ішінде жүруге болады. Цифрлық аспаптар панелі, ортаңғы сенсорлық экран және алдыңғы жолаушыға арналған дисплей бір блокқа біріккен. Жабдықтар тізіміне аса танымал емес Devialet компаниясының аудиожүйесі кірді.

Қытайда Fang Cheng Bao Tai 9 жыл аяғына дейін саудаға шығады. Ресми бағасы әзірге белгісіз. Инсайдерлер мен жергілікті басылымдар көліктің құны бұл класс үшін өте төмен болады деп болжады: 240-310 мың юань (16.6–21.5 млн теңге).