Соңғы бірнеше ай бойы кеңінен қолданылатын жанармай маркалары бір деңгейде тұр, бірақ бұған дейін баға айына бірнеше рет өзгерді. Қаңтардан бері бензин мен дизельдің құны қалай құбылғанын және жанармай қаншалықты қымбаттағанын қарастырайық.
Жыл басында АИ-92 мен жазғы дизельдің құнын мемлекет реттеді. 92-бензин 205 теңге, дизель 295 теңге еді. Билік бағаны еркін айналымға жіберу мәселесін қаңтардың ортасында талқылап, сол айдың 30-ы Энергетика министрі Алмасадам Сәтқалиев қол қойған бұйрық күшіне енді.
Баға бірден көтерілмеді. Алғашқы өзгеріс наурызда байқалды, ол кезде Алматы мен Астанада АИ-92 маркалы бензиннің құны 207–209 теңгеге өсті, Шымкентте сол уақытта литрі шамамен 198 теңге еді. Дизель 297–299 теңгеден беріле бастады.
Келесі екі айда станцияларда прайс аса өзгерген жоқ. Мәселен, мамырдың аяғында Алматыда 92-бензин 210–212 теңгеге сатылып жатты, Астанада 209–213 теңге аралығында, Шымкентте 200–201 теңге болды. Көктемнің аяғында дизельдің құны 303–311 теңгеге жетті.
Жазда бензин қымбаттай бастады. Кейбір бекетте баға апта сайын ауысты. Мысалы, маусымның аяғында Алматыдағы жүргізушілер АИ-92-нің 215–217 теңгеге алса, тамыздың соңғы күндерінде 227–231 теңгеге жоғарылады. Дизель 321–323 теңге тұрды.
Қыркүйекте Алматыдағы кәсіпкерлер АИ-92 үшін 235–236 теңге сұраса, дизель 327–328 теңгеге өтті. Астанада 92-бензин 231–235 теңге, дизель 321–323 теңге болды. Шымкентте жанармай әлі арзан еді: АИ-92 — 215–219 теңге, дизель — 318–328 теңге.
16 қазанда Үкімет жанармай бағасын қайта реттеу туралы шешім қабылдап, АИ-92 мен дизель құнын көтеруге мораторий енгізді. Олардың қазіргі бағасы 2026 жылғы наурыздың аяғына дейін сақталуға тиіс.
Қазір ірі желілер АИ-92 үшін 239 теңге сұрап отыр, Астанада баға 235–237 теңге аралығында, Шымкентте 222–225 теңгеге аласыз. Үш мегаполисте жазғы дизель 322–335 теңге тұрады. Қысқы дизельдің құнын мемлекет реттемейді, сондықтан Алматыда 620 теңгеге жетуі мүмкін.
Мораторий АИ-95 бензиніне әсер етпейді, ол қазаннан кейін қымбаттады. Жыл басында оңтүстік астанада 95-бензин 271–275 теңге тұрса, желтоқсанда литрі 306–316 теңгеге жетті. Яғни 40 теңгеге өсті. Астанада қыста АИ-95 300 теңге (298–306 теңге) шегінен асты, Шымкентте әзірге 292–295 теңгеден саудаланып жатыр.
Комментариев: 0