2023 жылы автосалондар 200 мыңдай көлік сатты. Бұл рекорд!

2023 жылы Қазақстанда жаңа автокөлік нарығы рекорд жаңартты. 12 айда дилерлер 198 686 автомобиль мен жеңіл коммерциялық техника сатты. «Қазақстанның автокөлік одағы» бұл 2022 жылғы көрсеткіштен 60.2 % жоғары екенін хабарлады. Сатылған көліктердің 70.7 %-ы Қазақстанда құрастырылған.

Жыл қорытындысы

2023 жылғы ең танымал бренд атағы Hyundai-ге бұйырды. Корей маркасы 46 725 автомобиль саудалады (2022 жылғы көрсеткіштен +61.9 % жоғары), ал Chevrolet автосалондары 45 807 машина сатты (+33.6 %). Екі бренд арасын 918 машина бөліп тұр. Үздік үштікті Kia (25 495 дана) түйіндеді. Төртінші және бесінші орынға Chery (12 229) мен Toyota (10 756) жайғасқан.

2023 жыл қорытындысы бойынша жаңа автомобильдер нарығындағы үздік 10 марка

Ең көп өткен модельдер тізімінде Chevrolet Cobalt көш бастады. 2023 жылы седанның 30 425 данасы өтті. Екінші және үшінші орындағы Hyundai Tucson (14 409) мен Kia Sportage-ді (10 503) қоса есептесе де «Кобальттың» нәтижесіне жетпейді. Одан кейін тізімде Hyundai Santa Fe (7 433), Chevrolet Onix (6 000), Hyundai Elantra (5 975), Hyundai Sonata (4 770), Hyundai Bayon (4 740), Chery Tiggo 7 Pro (4 309) және Chevrolet Nexia (3 958) жайғасқан. Үздік ондыққа Hyundai-нің 5 моделі енді.

1 / 10

• 
• 
• 
• 
• 
• 
• 
• 
• 
• 

1 / 10

Желтоқсандағы нәтиже

2023 жылдың соңғы айында 23 528 машина өтті, бұл былтырғы ең үздік көрсеткіш. Ал екінші үздік нәтиже қарашада тіркелді, қыстың алғашқы айында 18 957 көлік иесін тапты. Желтоқсанда көптеген марка клиенттерге тиімді жеңілдіктер жасады, соның арқасында жаңа көлік нарығында рекорд жаңарды.

Осының арқасында былтыр желтоқсанда Chevrolet — 5796, Hyundai — 4790, Kia — 2425, Toyota — 1446 және Chery 1391 машина сатты.

2023 жылғы желтоқсандағы нәтиже бойынша жаңа автомобильдер нарығындағы үздік 10 марка

Қазақстанда қанша автомобиль шықты

«Қазақстанның автокөлік одағы» 2023 жылы қаңтар мен желтоқсан арасында елде 148 885 көлік құралы конвейерден түскенін хабарлады. Бұл 2022 жылғы көрсеткіштен 30.2 % жоғары.

Бұл тізімде Қостанайдағы Allur зауыты көш бастап тұр. Онда 90 230 машина жасалды. Алматыдағы Hyundai Trans Kazakhstan 48 857 көлік құрастырды. Ал СемАЗ 3 788 коммерциялық техника өндірді.

Былтыр Қазақстандағы ресми автонарық қана емес, ескі көліктер нарығы мен жеке импорттаушылар да жақсы нәтижеге қол жеткізді. Елге кірген электромобиль саны артты. 200 000 теңге төлеп, шетелдік көлікті заңдастыру науқаны дилерлер саудасына кедергі болған жоқ, Ішкі істер министрлігі 300 мыңнан аса машинаны жеңілдікпен тіркегенін мәлімдеді.

2023 жыл ассортимент пен шынайы бәсеке нарыққа пайдалы екенін көрсетіп берді.

«Қазақстанның автокөлік одағы» мамандары 2024 жылы автонарық 10-15% өсетінін болжап отыр.