2023 жылы Еуропада электрокар ең танымал көлік атанды

Еуропада жеңіл автомобильдер саудасының 2023 жылға қатысты алдын ала жасалған қорытындысы жарияланды. Dataforce зерттеушілерінің дерегі бойынша Еуропа нарығында Tesla Model Y электрокары алға шығып, өте арзан Dacia Sandero-ны артта қалдырды. Ең қызығы Model Y үздік 30-дың ішіндегі жалғыз батареялы модель.

Еуропада сұранысы жоғары он көліктің ішінде бесінші орындағы Peugeot 208-ден басқасы жақсы сатылды. Алайда Model Y-дың танымалдығы артқаны бірден көзге түсті. Еуропа халқы 2022 жылы 137 608 электрокар алған болса, былтыр 254 822 кроссовер иесін тапты.

Тізімдегі көп модельдің электрлі нұсқасы болғанымен, Еуропа мен Ұлыбританияда Tesla Model Y ғана электромобиль ретінде сатылады. Кейбір дерекке сүйенсек, еуропалық емес премиум автомобильдің қарт құрлықта көш бастауы бұрын болмаған жағдай. Model Y-ға сұраныс өсуіне Tesla-ның біраз уақыт бұрын жасаған жеңілдігі де әсер етті.

Dacia Sandero-ның саудасы 200 736-дан 235 893-ке өсті, ал үшінші орын алған VW T-Roc-тың 206 438 данасы өткен. Сонымен қатар Еуропада Renault Clio, Opel Corsa, VW Golf, Toyota Yaris Cross және VW Tiguan модельдерін таңдайтындар көп. Ондықты Škoda Octavia түйіндеді.

Қытай автоөндірушілерінің қысымына қарамастан, былтыр Tesla электрокар шығаратын әлемдік көшбасшы атанды. Дегенмен төртінші тоқсанда калифорниялық компания өзінің өндірістік рекордын бұзған BYD концерніне орын берді. Талдаушылардың айтуынша қытайлар биыл электрокар нарығын жаулап алуы мүмкін.