Toyota тағы ең ірі автоөндіруші атанды

Toyota 2023 жылғы ресми есебін жариялады. Бренд былтыр көлік сату бойынша бірнеше рекорд жаңартыпты. Жапониядағы зауыттарда проблема болғанына қарамастан, Toyota әлемдегі ең ірі автоөндіруші атағын сақтап қалды.

Есеп төрт бөлімнен тұрады, онда Toyota-ның өзі, Lexus премиум бренді, Daihatsu маркасы және коммерциялық техника шығаратын Hino жайлы дерек бар. Осының бәрін қоса есептегенде 2023 жылы 11 233 039 автомобиль өтті, бұл бір жыл бұрынғы көрсеткіштен 7.2 % жоғары.

Toyota мен Lexus клиенттеріне 10.3 млн машина сатты, оның 8.6 миллионы Жапониядан тыс жерге кетті. Сатылым өсімі бойынша Lexus көш бастады, марканың ішкі нарықтағы саудасы – 129 %, әлем бойынша 30 % өсті. Toyota қай модель ең көп өткенін хабарлаған жоқ, бірақ RAV4 ең өтімді кроссовер болғаны белгілі. Әлемдік рейтингте ол Tesla Model Y-дан кейін екінші орын алған болуы мүмкін.

Концерн гибрид, электрокар және сутекті машиналар сатылғанын хабарлады. Мұндай экологиялық көліктердің 3.68 миллионы иесін тапты. Бірақ небәрі 104 мың таза электромобиль өткен, бұл бір жыл бұрынғыдан 325 % көп.

Volkswagen концерні де нәтижесін жариялады, VW Group бір жылда 9.24 млн машина сатты. Hyundai, Kia және Genesis бірге 7.32 млн автомобиль саудалады. General Motors және Stellantis жыл қорытындысын әлі жариялаған жоқ, бірақ сарапшылар 2022 жылғы нәтижені ескере отырып, бұл өндірушілер 6 млн машина сата алғанына сенімді.