ЕО нарығында кроссовер үлесі артып келеді

Бұрын АҚШ жұрты SUV мінуге құмар деп мысқылдайтын еуропалықтар енді өздері осындай машинаға қызыға бастады. Automotive News Europe жариялаған Dataforce дерегіне сүйенсек, былтыр Еуропада әртүрлі өлшемдегі 6.63 млн кроссовер өткен, бұл жаңа автомобиль нарығының 51 %-ын құрап отыр.

Осылайша SUV категориясының саудасы 2022 жылғы көлеммен салыстырғанда 19 % өсті. Бұл көрсеткішке 2023 жылы Қарт құрлықта 254 822 данасы өтіп, ең танымал модель атанған Tesla Model Y оң әсер етті. Сондай-ақ орта көлемді премиум кроссоверлерге сұраныс артып отыр. Мысалы, Mercedes-Benz GLC саудасы 32 % артып, 91 259 данаға жетті.

Dataforce премиум класс модельдері жылдам электр жетекке ауысып жатқанын анықтады, былтыр Еуропада сатылған люкс седандардың 58 %-ы электрлі болды. Бірінші орында 19 965 данасы өткен Porsche Taycan тұр, ал Mercedes-Benz S-Class-тың 9 992 данасы ғана иесін тапты.

Еуропада сатылған орта және ірі көлемді кроссоверлердің 47 %-ы батареялы модель, мұнда Volkswagen ID.4 бестселлер атанды. Түрлі қиындыққа қарамастан неміс концерні 2023 жылы көшбасшы орнын сақтап қалды, VW және оның еншілес брендтері ЕО автонарығындағы 21 категорияның 12-сінде үздік шықты.