Toyota Жапонияда Land Cruiser-ге тапсырыс қабылдауды тоқтатты

Toyota өз отанында бірнеше модельге тапсырыс қабылдамайтын болды. Тізімде Land Cruiser 300, Alphard және Aqua бар. Nikkei басылымы пандемия салдарынан кестеден қалып қойған концерн қарқынды жұмыс істеп, жылдамдатып машина шығарып жатса да, клиенттер көлігін айлап күтуге мәжбүр деп жазды.

Сарапшылар Toyota өндіріс көлемін қанша ұлғайтса да, сұраныс тым көп болғандықтан, шамасы келмей жатыр деп санайды. 2023 жылғы қорытынды бойынша концерн 3.34 миллион автомобиль өндіруге ниетті, бұл пандемия алдындағы көрсеткіштен біршама жоғары.

Алайда коронавирус кезінде сұраныс пен ұсыныс арасы тым алшақтап кетті. Toyota микрочип жетпегендіктен өндіріс процесін бәсеңдеткенмен, тапсырыс қабылдауын доғармады.

Қазіргі жағдайға әсер еткен тағы бір фактор — сату құрылымының өзгеруі. Бұрын белгілі бір модельдерді тек таңдаулы дилерден алуға болатын, ал бір-екі жыл бұрын бренд бұл ұстанымынан бас тартты. Енді кез келген «тойотаны» кез келген дилердің салонынан табуға болады. Салдарынан бұрын көп сатушының қолы жетпей жүрген көліктерге тағы сұраныс артты.

Nikkei таратқан ақпаратқа сүйенсек, былтыр жыл аяғында тапсырыс беру мен жеткізу арасында шамамен алты ай өтетін. Қазір клиент бес айға жуық күтеді, концерн көктемге қарай бұл уақытты төрт айға дейін қысқартуды көздеп отыр. Бірақ өз отанында Toyota өнімдерін таңдайтындар өте көп.