Автокөлік алу оңай шаруа емес, оның үстіне әр адам шешімді өз қажеті мен мүмкіндігіне қарай қабылдайды. Бұл материалда біз сіздің қалтаңызда бір миллион теңге бар деп елестетіп, бұл ақшаға нарықтан қандай машина табуға болатынын қарастырмақпыз.
Машиналарды бірнеше шарт бойынша таңдадық. Біріншіден, бағасы. Бізде 1 млн теңге ғана бар. Екіншден, хабарландыру саны. Нарықта ұсыныс көп болған сайын жақсы көлік табу мүмкіндігі де артады. Үшіншіден, машина Қазақстанда тіркелген болуы қажет. Шетелдік көліктерді есепке алған жоқпыз. Үшінші талап тізімнен ВАЗ-2114-ті шығаруға мәжбүр етті, Материал дайындалған сәтте Kolesa.kz-те 1.6 мыңға жуық ВАЗ-2114 сатылымда болды, бірақ оның 200-і ғана біздің елде тіркелген. Оның орнына Volkswagen Passat үздік атанды. Негізінен бұл 1988-1993 жылдары жарық көрген B3 үлгісі. Сатылып жатқан 1033 көліктің арасында кейінірек шыққан B4 пен B5 те бар. Бірақ басым бөлігі жөндеуді қажет етеді не кепілде тұр. Тізімдегі Volkswagen Passat-тардың көбі механикалық қораппен және седан шанағында. Ең арзаны 350 000 теңге тұрады. Екінші орын Opel Vectra еншісінде. Порталдағы 1023 көліктің көбі 1988-1995 жылдары шыққан бірінші буын моделі. Атауында B индексі бар машиналар да кездеседі. Айта кетерлігі, сатылымдағы Opel Vectra-ның үштен бір бөлігі газ баллонмен жабдықталған. Ең арзаны 250 мың теңге тұрады, жағдайы ақшасына сай. Үздік үштікті халық арасында бөшке аталатын Audi 80 түйіндейді. Kolesa.kz-те 1980-1996 жылдары жарық көрген 871 машина бар. Бұлардың арасында универсал жоқтың қасы. Толық жетекті нұсқалары да өте аз. Негізінен механикалық қорабы мен 1.8 литрлік моторы бар седандар сатылып жатыр. Үздік бестік тізіміндегі соңғы екі орын Volkswagen Golf пен Mazda 626-ға бұйырды. Германиялық модельдің 748, ал жапониялық көліктің 722 данасы сатылып жатыр. Қалтаңыздағы ақша 1 миллион теңгеден аспайтын болса, Kolesa.kz-тегі 23 мың хабарландыру арасынан таңдау жасай аласыз. Олардың 16.4 мыңы біздің елде есепте тұр. Таңдау бар, бірақ көбінің жасы 25-тен асқан және жүздеген мың шақырым жол жүріп өткен. Жоғарыдағы тізімге енген үлгілерден бөлек, порталдан алтыншы және жетінші буындағы Mitsubishi Galant (619), ВАЗ-2107 (595), Mercedes-Benz E-Class W123, W124 пен W210 (578), Audi 100 C3 пен C4 (577), Nissan Primera P10 мен P11 (510), Mercedes-Benz 190 (460), ВАЗ-2106 (429), бесінші сериялы BMW (290) және Daewoo Nexia (201) табуға болады.
1 млн теңгеге тағы қандай көлік алуға болады
Комментариев: 0