Алакөлге бару үшін Алматы — Өскемен тас жолының жартысына жуығын басып өтесіз. Бірнеше жылдан бері жөндеуден өтіп жатқан трасса биыл аяқталады деген жоспар бар. Біз жол қалай екенін көріп қайттық.
Оңтүстік астанадан шыққан соң «Қапшағай» тас жолымен жүрдік. Қонаевқа дейін ақылы бетон жолмен жарты сағат жүріп, трассаның асфальт бөлігіне түстік. Қапшағайдан кейін ақылы жол төрт жолақты болады. Жол ақысы қанша километр жүргеніңізге және автомобиль санатына байланысты есептеледі. Жол ақысын қайтарда, Алматыға кіреберістегі ақы алу бекетінде немесе мобильді қосымша арқылы төлеуге болады. Рұқсат етілген жылдамдық — 110 км/сағ.
Трассаның осы бөлігінде демалыс орындары бар. Онда автотұрақ, эстакада, беседка және қоқыс контейнері орналасқан. Дәретхана жоқ. Жолаушы қатты қысылса, жол шетіне баруға мәжбүр болады.
Мегаполистен 100 шақырым жерде салыстырмалы түрде өркениетті демалыс орны орналасқан. Мұнда ерлерге, әйелдерге және мүмкіндігі шектеулі жандарға арналған дәретхана тұр. Оған 100 теңге төлеп кіресіз. Бұл жерден дүкен мен асхана да табылады. Тамақ ішіп, демалып, әрі қарай жолға шығасыз. Бұл жерге дейін асфальттан кемшілік көрген жоқпыз.
Одан кейінгі демалыс орны жүргізушілерге кеңес кезінен бері таныс. Ол Алматыдан 140 шақырымдай жерде, Арқарлы асуының етегінде орналасқан. Онда бірнеше дәмхана мен әжетхана бар. Құрт, қымыз сатып отырған әжелерді кездестіресіз.
Шамамен үш сағатта 260 шақырым жол жүріп, Талдықорғанға жетесіз. Қажет болса, қалаға кіріңіз, болмаса бірінші бағдаршамнан оңға бұрылып, айналма жолмен кетуге болады. Аты айналма жол болғанымен, іс жүзінде қала қиылыстарына тоқтамай, уақыт ұтасыз. Талдықорғаннан он шақырым өткен соң ақылы жол бітеді. Әрі қарай free road.
Тағы елу шақырым жүрген соң 2010 жылы тасқын шайып кеткен Қызылағашқа жетесіз. Ауыл қалпына келген. Трасса бойында шағын дүкені, дәретханасы, душы бар қызмет көрсету кешені орналасқан. Ал орталықтың еденін Ақсу ауданының экс-әкімі жуатынына сенесіз бе!
Қызылағаштан 63 шақырым өткен соң Жансүгіров ауылы маңында міндетті түрде тоқтап, тынығатын жер бар. Лепсі өзеніндегі көпірден өткенде оңға бұрылып, топырақ жолға шығасыз. Бірнеше жүз метр жүргеннен кейін жергілікті шағын су электр станциясына жетесіз. Ол жер әдемі әрі салқын.
Одан кейін тағы екі жүз шақырымнан аса тегіс, жаңа төселген асфальтпен жүресіз. Кей жерде жол жиегінде техникалар әлі тұр. Ең бастысы, жұмыс жүріп жатқан аумақтарда «жылдамдық шектеу» сияқты уақытша белгілер орнатылған. Жол бойында жүрген полиция көліктері де аз емес. Сондай-ақ ауылдардағы жылдамдық 40 км/сағ-қа шектелген жерлерде камералар ілулі тұр. Жол ережесін елемесеңіз, айыппұл төлейтініңіз анық.
Үшарал маңындағы бір шақырым жерде жол әлі жөнделіп жатыр. Оны топырақ жолмен айналып өтесіз. Ол да тегіс, аласа «Приора» болмаса, басқа кез келген жеңіл автомобиль жүре алады. Бірақ жол жөндеушілер шілденің аяғына дейін мұнда асфальт төсейміз деп отыр. Өскеменге бұрылатын жолайрық та дайын болады.
Осыдан кейін — Үшарал, одан әрі тағы елу шақырым жүрген соң Алакөлге ат басын тірейсіз!
Сапарымызды қорытындылай отырып, Алакөлге баратын жол тамаша деп сенімді түрде айта аламыз. Кез келген автомобильмен жүруге болады. Жолда аялдай отырып, көлге сегіз сағатта жеттік. Қаласаңыз, ерте жолға шығып, жылдам жүріп, бұдан тезірек жетуге болады.
Kolesa.kz-тің YouTube-арнасындағы «Жолаушы» жобасында жолдағы оқиғаларымыз бен Алакөлге баратын жол жағдайы туралы толығырақ баяндадық. Видеоны тамашалап, арнаға жазылыңыз!
Сәт сапар, көңілді демалыс болсын!
Комментариев: 0