Биыл 11 наурызда Үлкен Алматы айналма жолында он неше көлік соғылды. Оған тас жолдағы қалың тұман себеп болған. Жүргізушілер алдында келе жатқан машинаны көрмей өзара соғылыпты. Мұндай жағдай жылда болып тұрады.
Автомобильді жолға дайындау
Синоптиктер болжамына сенім артуға болады, бірақ тұман кенеттен пайда болуы мүмкін, сондықтан кез келген сапар алдында мына нәрселерді тексеру қажет:
- Күндізгі жүріс шамы, шам, бұрылыс сигналы, алдыңғы және артқы тұманға қарсы шамды (бар болса).
- Әйнек сүрткіш сұйықтығын.
- Кондиционер мен желдету жүйесінің жағдайын.
- Шина қысымын.
Тұманда қандай қауіп туындайды?
Тұман — бу, шаң, түтін, күйе және т.б. араласқан лас ауа. Демек тұман ылғалдан пайда болады. Тұман түскенде мынадай қиындық туады:
- Айнала анық көрінбейді. Жол таңбасы, бордюр немесе жол бойындағы ағаш, бұталарға қарап қана жүре аласыз. Көлік шамының жарығы тек жақын келгенде көрінеді.
- Көлік терезесі буланып, сырт жақ көрінбейді. Шанақ пен сыртқы оптика және артқы көрініс айнасы буланады.
- Ылғалдың әсерінен тас жол асфальты немесе бетон жабыны тайғақ болады. Ал аязда тұман қатып, жолда жұқа мұз қабаты пайда болуы мүмкін.
- Жол анық көрінбегендіктен, таныс жолдың өзінде бағыттан жаңылып қалуыңыз ықтимал.
Тұманда көлікті қалай қауіпсіз жүргізуге болады
1. Тұман түскен кезде жолда жүрген жүргізуші үшін басты қағида — жылдамдықты азайту. Егер соқыр тұман түсіп, капоттан арғы жер көрінбесе, жол шетіне шығып, апаттық шамды қосып тоқтаңыз.
2. Тұманда тұманға қарсы шам қосу керек. Артта тұманға қарсы шам болмаса, апаттық шамды қосуға болады.
3. Алысқа түсетін шамды жағудың қажеті жоқ, өйткені оның жарығы тұманмен шағылысып, жағдайды тіптен қиындатады. Жақынға түсетін шамды да сөндіруге болады, өйткені зауытта орнатқан тұманға қарсы шамның жарығы жолға түседі әрі басқа машина соған қарап, сізді байқай алады.
4. Түпнұсқа тұманға қарсы шамды ксенон немесе led-элементі бар шыраққа ауыстырудан пайда жоқ. Ең дұрысы, тұманға қарсы сары түсті шамды пайдалану.
5. Салондағы буды терезені ашу арқылы кетіре алмайсыз. Одан да кондиционерді алдыңғы және бүйірлік әйнекке бағыттап қосу қажет. Көптеген машинада терезені жылдам жылытатын бөлек функция бар. Бұл әдіс қыста да, жазда да жұмыс істейді.
6. Алдыңызда автомобиль болса, қашықтық сақтаңыз әрі оның соңынан ермеген жөн. Өйткені алда келе жатқан жүргізуші қателесіп, басқа бағытқа кетіп қалуы мүмкін. Сондай-ақ тұманда көліктер арасындағы қашықтық әдеттегіден алыс болып көрінетінін ұмытпаған абзал.
7. Тұманда көзіңіз ғана емес, құлағыңыз да түрік болсын. Жол жиегіне шығып кеткеніңізді дөңгелек астындағы тас тықырынан аңғаруға болады. Мұндайда музыканы өшіріп, сөйлеспей отырған дұрыс.
8. Кенеттен маневр жасамаңыз, жылдамдықты шұғыл арттырмаңыз және тежемеңіз. Басқа жүргізушілер де сіз сияқты ештеңе көре алмай келе жатқанын ұмытпаңыз.
9. Тұманда шам түсі мен өлшеміне сенбеңіз. Су тамшысы қызыл немесе жасыл шамды сарыға айналдырады. Демек, алдыңызда жанған шырақ кенет тоқатаған машинаның артқы жағы ма, әлде бағдаршам ба, ажырата алмайсыз.
10. Тұманда ұзақ жол жүрсеңіз, арасында қауіпсіз жерге тоқтап, көзді демалдыра тұрған жөн.
11. Тұманнан шыққан соң тұманға қарсы шамды өшіру керек. Өйткені ашық күнде артқы жарық сізден кейін келе жатқан жүргізушілерге тиімсіз болады.
Жолыңыз болсын!
Комментариев: 0