Қазақстанда биыл жаңа көлік қымбаттағанына қарамастан, оларға сұраныс артып, жұрт айлап кезек күтуге мәжбүр. Оның үстіне ресми бағасына алу қиын, салондағылар жабдықпен қосып сатады. Сондықтан жұрттың ойға қонымды бағаға жақсы машина табармын деген үмітпен екінші нарыққа назар аударуына негіз бар. Алайда бұл жақта да жағдай оңып тұрған жоқ.
Kolesa.kz редакциясы танымал модельдер құнында 2021 жылғы 1 қаңтардан 1 қарашаға дейін қандай өзгеріс болғанына талдау жасады.
Toyota Camry XV70
2019 жылғы седанның орташа бағасы 13 827 900-ден 14 874 100 теңгеге (+7.6 %) көтерілген. Графиктен тамыздан бері баға онша өзгермегенін байқауға болады, алайда күз келісімен күрт құбылып, бірден 7.2 %-ға қымбаттады.
Toyota Land Cruiser Prado
150-прадик те Camry-ден қалыспай, құны біршама артты. Жыл басында 22 560 300-ден саудаланған жол талғамайтын көлік қазір 25.4 млн теңгеге (+11.6 %) сатылып жатыр.
Toyota Land Cruiser 200
Қаңтарда бұл модельдің бағасы 35 634 100 теңге шамасында болатын, ал 1 қарашада сатушылар 38 179 300 теңге (+7.1 %) сұрай бастады. Айта кетерлігі, қаңтар мен ақпан арасында ол бірден 38.1 миллионға қымбаттаған, ал одан кейінгі айларда бағасы бір көтеріліп, бір түсіп отырды.
Kia Rio
Екі жастағы Kia Rio жыл басында 6 741 600 теңгеге бағаланды. Кейінгі бірнеше айда бағасы біраз құбылды. Жаз келгенде 6 630 900 теңге шамасында тұрақтаған, артынан сатушылар тағы қымбаттатып алды. Қазір оны алам десеңіз, қалтаңызда 8 169 100 теңге болуға тиіс.
2021 жылға дейін автомобиль салоннан шыға салысымен ұсталған көліктер қатарына өтіп, бірден 10 % құнын жоғалтады деген қағида қалыптасты. Ал дәл қазіргі уақытта салоннан шыққан көлік иесіне кезек күтпес үшін 10 % қосымша ақша ұсынатындар аз емес.
Kia Sportage
Екі жастағы Kia Sportage бағасындағы өзгеріс америкалық аттракционды еске салады, маусым мен шілдеде құны артқан көлік тамызда қайта арзандаған, қыркүйекте сәл өсім байқалып еді, қарашаның басында бірден 8 %-ға қымбаттады. Қаңтар мен қараша арасындағы айырмашылыққа мән берсек, модель бағасы 11 731 800-ден 12 601 700 теңгеге (+7.4 %) жеткені байқалады.
Hyundai Accent
Hyundai Accent иелері жыл басында 6 482 800 теңге сұрайтын. Мамырдан бастап көз ілеспес жылдамдықпен қымбаттаған модель қазір 7 887 700 теңгеге (+21.7 %) сатылып жатыр. Демек Accent-ті қысыл-таяң басталмай тұрып, қосымша жабдықсыз алғандар машинасын бастапқы құнынан қымбат сата алады.
Hyundai Santa Fe
2019 жылғы кроссвердің бағасы былтыр өсе бастаған. 2021 жылы қаңтарда 14 590 800 теңгеден саудаланды. Бірақ наурыз келісімен жағдай күрт өзгеріп, арзандай бастады. Ең төмен бағасы 14 211 700 шамасында болды. Жазда құны қайта көтерілген машина қыркүйек пен қараша арасында 8 % өсім көрсетті. 1 қаңтардағы мәлімет бойынша қазір кроссверді 15 988 500 теңгеге алуға мүмкіндік бар.
Ravon Nexia R3 (Chevrolet Nexia)
Өзбек ағайын құрастырған Ravon көліктер әлемінен кетіп, салондарға Chevrolet белгісі тағылған машиналар қайта оралды. Ал көп жұрттың қолында ек жастағы дәл сол «равондар» жүр. R3 үшін қаңтарда 4 078 600 сұрайтындар қазір оны 4 828 500 теңгеден (+18.4 %) саудалап жатыр. Мұның да бағасы жазда өсе бастады.
Ravon R4 (Chevrolet Cobalt)
R4 те біздің нарыққа Chevrolet маркасымен келіп жатыр. «Кобальт» 10 ай нәтижесі бойынша Қазақстанда ең көп сатылатын модель атанды. Екінші нарықта да ол жақсы бағаланады. Екі жастағы көліктер қазір 5 774 300 тұрады, ал қыста модельді 4 902 800 теңгеге алуға болатын еді. Такси ретінде пайдалану үшін алып, 50 000 км жол жүрген соң қымбат сатуға ешкім кедергі болмасы анық.
Lada Granta
Салонда тұрған «Грантаға» сатушылар қосымша жабдық қосқанына қарамастан, оны алам деушілер өте көп. Бір ғана қазан айында модельдің 529 данасы өткен. Ал егер кілемше, тіркеуіш, дабыл жүйесінен бас тартсаңыз, бірнеше ай кезек күтуге тура келеді. Қолдан сататындар да Granta бағасын асқақтатып алған. 10 айда жүрілген модель 11.4 %-ға қымбаттады. Бұрын 3 867 400 теңгеден сатылған «грантаны» қазір 4 309 400 теңгеге аласыз.
Lada 4×4
«Нива» бағасы да жыл басталғалы сан құбылғанымен, соңғы нәтиже алдыңғыдан аса алшақ емес. Қыста 4 109 500-ден сатылған машина қазір 4 330 400 теңге тұрады.
Біздің елде танымал Largus жайлы да айта кеткен жөн. Қаңтар-ақпанда оның құны 4.9-дан 5.2 млн теңгеге өсті, ал қазанда қайта таз қалпына түскен. Бірақ қуануға негіз жоқ, өйткені 1 қарашада орташа құны тағы 5.2 млн теңгеге көтерілді.
Екінші нарықта әлдеқайда ескі көліктердің де қымбаттағаны байқалады. Мысалы, 2007 жылғы Camry құны жыл басталғалы 5.3-тен 6 млн теңгеге артты. Ал ескі Lexus RX330 (2004) бағасына 700 мың қосылған.
Комментариев: 0