Жүргізуші куәлігін алғысы келетіндерді биометриялық сәйкестендіру 2021 жылы сәуірде іске қосылып, тест сұрақтарына жауап беру барысы видеоға жазылатын болды. Пилоттық жоба алдымен Алматыдағы № 1 және № 6 мамандандырылған ХҚКО-да, сондай-ақ елордадағы орталықта енгізілді. Ал қазір бұл жүйе тұтас Қазақстанда теориялық емтихан тапсыру барысын бақылайды.
«Мамандандырылған ХҚКО-да биометриялық сәйкестендіру енгізілгеннен бері жүргізуші куәлігін алғандардың саны орта есеппен 58 %-ға азайды», — деді «Азаматтарға арналған үкімет» мемлекеттік корпорациясының басқарма төрағасы Сүйеніш Әбділдин брифингте.
Сонда әрбір екінші қазақстандық үшін өзге біреу емтихан тапсырып келген бе? Әлде жүйенің өзі ме? Жол ережесін білмейтіндерге жүргізуші куәлігін берудің зардабы өте ауыр. Елімізде жол апаты азаймай тұр. Қазақстан прокуратурасы берген мәліметке сүйенсек, 2022 жылы алғашқы үш айдың өзінде 2.6 мың жол апаты болып, 3.6 мың адам жараланды және 410 адам қайтыс болды.
С.Әбділдиннің айтуынша емтихан тапсырушыларға қойылатын талапты күшейту өз жемісін берді, қазір үміткерлер емтиханды 4-5 рет тапсырған соң ғана куәлік ала алады. Ереже білмейтіндер сынақтан өте алмайды.
Мемлекеттік корпорация ҚР Ішкі істер министрлігімен бірлесіп автомектептердің жауапкершілігін күшейтуді және автоХҚКО-да сынақ емтиханын (теориялық және практикалық) тапсыруға мүмкіндік беруді жоспарлап отыр.
Комментариев: 0