— Соңғы 17 жылда Қазақстанда 270 мың жол апаты ресми тіркелді. Салдарынан 49 мың адам көз жұмып, 300 мың адам түрлі дәрежеде жарақат алған. Қаза тапқандардың елу пайызы жастар, — деді «Жол активтерінің ұлттық сапа орталығы» РМК бас директоры Замир Сағынов. Мұның негізгі себебі жылдамдықты шектен тыс асыру екенін атап өтті.
Мысал ретінде ол Нұр-Сұлтан — Щучинск тас жолындағы жол бөлігін атады. Мұнда биылғы тоғыз айда 8 280 жылдамдықты асыру (150 км/сағ) дерегі тіркелді. 58 жағдайда жүргізушілер сағатына 200 шақырым жылдамдықпен қозғалған. Спикердің сөзінше, камералар ҚР ІІМ ӘПК базасымен бірікпегендіктен, ереже бұзғандарды жауапқа тарту мүмкін болмай отыр.
— Сондықтан осы мәселені шешу үшін жолдарға Әкімшілік полиция комитетінің базасымен біріктірілген камера қойып, заңға орташа жыдамдықты анықтау әдісін енгізу қажет деп есептеймін, — деді Замир Сағынов.
Автожолдарда полицияның деректер базасына қосылмаған камералардың не үшін тұрғанын, оларды кім орнатқанын және қандай функция атқаратынын мекеме басшысы түсіндірмеді, бірақ қазіргі уақытта елдегі жол белгілерінің 46 %-ы мен 251 км жол таңбасының стандартқа сай келмейтінін айтты. Ал елді мекендердегі 50 % белгі мен 40 % жол таңбасы түзетуді қажет етеді.
Сапасыз асфальттың төселуін З. Сағынов әкімдікте мамандардың жетіспеуімен түсіндірді.
— Нашар жолдар аудан, облыс және ауыл-аймақ деңгейінде салынады. Біз бұл жағдайды сараптап, онда кадр жоқтығын анықтадық. Елдің бәрі жымқыру мақсатында нашар жол салмайды. Бұл іске тартылған көп адамның тиісті білімі жоқ, — деді орталық басшысы.
Комментариев: 0