Швейцарияның Comparis порталында көп жүрмеген BMW M3 Touring суперуниверсалы сатылады. Бағасы — 72 999 Швейцария франкі. Бұл осы модель үшін аса көп сома емес. Бірақ машина ауыр жол апатына түскен. Аталған порталда мұндай ақшаға 5 литрлік моторы бар жаңа Ford Mustang сатылып жатыр.
M3 Touring қандай апатқа түскенін сатушы жазбапты. Фотосуреттен универсалдың алдыңғы жағы қатты зақымданғанын көруге болады, оны жөндетуге көп қаржы кететін сияқты.
Бампер мен оптикасы толықтай сынып, қанаты мен капоты және қозғалтқышты салқындату жүйесіне ауыр зақым келген. Бампер күшейткіші де жарамсыз болып қалыпты. Сондай-ақ алдыңғы және бүйірлік қауіпсіздік жастығы ашылып кеткені байқалады.
Апат алдыңғы аспа мен шанақ құрылымына әсер еткен сияқты. Агрегат бөлімі де зақымданған болуы мүмкін. BMW M3 Touring 510 ат күшіне ие (650 Нм) 3 литрлік 6 цилиндрлі мотормен жабдықталған, ол 8 диапазонды автомат және толық жетекті жүйемен жұмыс істейді. Алғашқы жүз шақырымды 3.6 секундта еңсереді.
Компания BMW M3 Touring-ке алдын ала тапсырыс қабылдауды былтыр қыркүйекте бастаған. Демек жол апатына түскен автомобиль жап-жаңа деген сөз. Мұны машинаның жүрген жолы да растайды. Хабарландыруда суперуниверсал 2300 км ғана жол жүргені жазылған.
Комментариев: 0