Үкіметінің арнайы қаулысымен қоршаған ортаны жақсартуға бағытталған өңдеу саласындағы жобаларды «ӨКМ операторы» арқылы қаржыландыру ережесі өзгерді. Құжатқа сай «Жасыл Даму» АҚ-ға берілген 100 миллиард («ӨКМ операторы» шотында қалған ақша) қазақстандықтарға мынадай шартпен беріледі:
- Елде құрастырылған бір жеңіл көлікке берілетін жеңілдікті несие сомасы 10 000 000 (он миллион) теңгеден, ал машинаның бағасы 15 000 000 теңгеден аспауы керек.
- Қарыз алушыға (машина сатып алушы) автонесие екі жылда бір рет қана беріледі.
- Несие мерзімі 7 жылға дейін.
- Бастапқы жарна — 0 %.
- Несие валютасы — теңге.
- Қарыз алушы үшін номиналды сыйақы мөлшерлемесі 4 %-дан аспайды.
- Жылдық тиімді мөлшерлеме қарыз алушының көлік құралын сақтандыру және тіркеу шығындарын ескере отырып 7.5 %-дан аспауы керек. Қарыз алушы автокөлікті сақтандыру және кепілге ресімдеуге кететін шығынды төлейді.
Нарықтағы жаңа автокөліктер туралы хабарландыруларды Kolesa.kz сайтының арнайы бөлімінен көруге болады.
Ереже бойынша банктер ел азаматтары қайтарған ақшаны жеңілдікті автонесие беруге қайта пайдаланса (револьверлік жүйе) болады.
Бағдарлама қаражатын шетел валютасымен немесе несиенің мақсатына сәйкес келмейтін басқа да жабдыққа жұмсауға тыйым салынады.
Сондай-ақ биыл автобус паркін жаңарту үшін 30 млрд теңге бөлінеді, тасымалдаушылар және әлеуметтік-кәсіпкерлік корпорациялармен мынадай шартпен келісім жасалады:
- Лизинг мерзімі — 7 жылға дейін.
- Автобус алушы үшін сыйақы мөлшерлемесі — лизингтің бүкіл мерзімі үшін біржолғы төлеммен 0.01 %.
- Лизинг бойынша бастапқы жарна (аванс) — лизинг нысаны құнының 0 %-ы.
- Қосымша шығындар (сақтандыру, сервистік қызмет көрсету және лизинг нысанасын ұстау) — автобустарды лизингке алушы есебінен өтеледі.
Құжатта бірлескен қызмет туралы келісім аясында лизинг алушы ӘКК мүлікті пайдаланғаны үшін сыйақы және өзге де комиссияларды төлеуге байланысты тасымалдаушының шығынын ұлғайтуға құқығы жоқ екені жазылған.
Тағы бір айта кетерлігі, республикалық маңызы бар қалалар мен облыс орталықтарындағы автопарктер жеңілдікпен лизингке автобус ала алмайды. Егер банктерге жыл бойы аймақтық тасымалдаушылардан өтініш түспесе, олар сонда ғана елорданың, Алматының, Шымкенттің және т. б. автобус паркімен жұмыс істей алады.
Бірақ біз сөз етіп отырған құжат ҚР ИИДМ уәде еткен жеңілдікті автонесие бағдарламасы емес, соған бағытталған маңызды қадамдарының бірі.
Аталған бағдарлама туралы толық мәліметті (қашан басталады, оған қандай банктер қатысады және т.б.) Қазақстан үкіметі сәуір айының соңына дейін жариялайды.
Комментариев: 0