Қазақстан Даму банкі хабарлағандай, бағдарламаға қатысатын екінші деңгейлі банктер қазіргі қарызды ай сайын төлеп отырған тұрғындардан түскен төлемді жинақтап жатыр. Револьверлік жолмен қайтқан ақша негізінде пайызы төмен автонесие беру 2023 жылғы қаңтардың екінші жартысында басталады. Екі бағдарлама бойынша 13 млрд теңге көлемінде қаражат жиналады, бұл кемінде 1300 жаңа автонесие беруге жетеді.
«Азаматтарға ыңғайлы әрі әділ болу үшін және халықты көбірек қамту мақсатында қолданыстағы екі бағдарламаның үздік опциясы қолданылады. Бұл қаражат көзін біріктіріп, тұрғындардың елімізде шыққан жаңа автокөлікті бірыңғай және ашық ереже бойынша сатып алуына мүмкіндік береді», дейді ҚДБ.
ҚДБ таратқан ақпаратқа сенсек, 2022 жылғы 1 желтоқсанға дейін Қазақстанда банктер 14 мыңнан аса пайызы төмен несие мақұлдады, оның ішінде 12.5 мыңнан аса жаңа машина берілді. Автонесиенің орташа бағасы 7.8 млн теңге болды. Бағдарламаға Halyk Bank, ForteBank, Банк ЦентрКредит және Еуразиялық банк қатысып жатыр. Аталған банктерге алдын ала берген өтініші мақұлданған азаматтар көлігі келгенде несие рәсімдейді.
Өнеркәсіпті дамыту қоры биыл қарашада автонесие қазіргі қарыз алушылар қайтарған қаражат есебінен қайта берілетінін айтқан. Процесс ашық болу үшін азаматтардың өтініші тек онлайн түрде, арнайы портал арқылы қабылданады.
Комментариев: 0