Бұған дейін Еуразиялық экономикалық одақта жұмыс істейтін өндірушілер мен ресми дилерлерге 2023 жылғы 1 ақпанға дейін SOS батырмасы жоқ машина шығаруға және әкелуге рұқсат берілген. Сондай-ақ 2023 жылғы 31 желтоқсанға дейін машинаны құрылғымен немесе жедел көмек көрсететін қызметті шақыру жүйесімен қайта жабдықтау міндеттелді. SOS батырмасын орнату қажеттігі туралы тұтынушыға өндіруші хабарлауы керек. Көлік құралының төлқұжатына қайта жабдықтау керек екені жазылған белгі қойылады.
Қазір Қазақстанда жеке тұлғалар көлік әкелсе батырма орнатуға міндетті. Бұл не үшін деген сұрақ туындайды. Аталған бөлшек өте тапшы. Оның үстіне ол мінсіз жұмыс істемейді. Бағасы да қымбат.
15 маусымда комиссияның ресми сайтында мынадай хабарлама жарияланды:
«Жеке тұлға ЕЭО аумағына өзі пайдалану үшін машина әкелсе, оған құрылғы немесе жедел көмек көрсететін қызметті шақыру жүйесін орнатпауға рұқсат беру туралы Қазақстан тарапының ұсынысы талқыланады. Оның нәтижесі ЕЭК кеңесінің келесі отырысында белгілі болады».
Кей мәлімет бойынша ЕЭК Кеңесі жеке тұлғалардан SOS батырмасын талап етпеу туралы шешімді 21 маусымда қабылдайды екен.
Қазір ЕЭО аумағына азаматтар әкелген машинаға SOS батырмасын орнату туралы талап Қазақстанда ғана бар. Ресей санкция және бөлшек тапшылығына байланысты биыл мамырдың ортасында оның күшін жойған. Беларусьте жеке тұлға өзі пайдалану үшін машина әкелсе көлік құралы құрылымының қауіпсіздігі туралы сертификат пен SOS бартырмасын орнату талап етілмейді. Ал Қырғызстан мен Арменияда «ЭВАК» және «ЭРА/ГЛОНАСС» жүйесі жұмыс істемейді. Демек қазір батырма орнатылмаған машина әкелуге біздің елде ғана тыйым салынады.
Комментариев: 0