Депутаттар заңға жеке кәсіппен айналыспайтын тұрғындардың лизингіге автомобиль алуына мүмкіндік беретін өзгеріс пен түзету енгізу туралы ұсыныс айтты. Ұлттық экономика министрлігі бұл халықты несие қамытынан босатып, әлеуметтік жағдайын біршама түзеуге жағдай жасайтын идея екенін хабарлады.
Мәжілісмендер заңға «келісімшарт бойынша мемлекет есепке қоятын жер үй, пәтер, автомобиль лизинг заты бола алады» деген норманы қосуды көздеп отыр.
Қай машина қандай шартпен рәсімделетіні әзірше белгісіз. Тек депутаттардың жоспары бойынша лизинг беруші келісімшартқа өзі сұрайтын комиссия мен басқа төлемдерді және олардың көлемін жазуға міндеттеледі. Одан бөлек 90 күннен аса төлем жасалмаса, айыпақы төлеуден босатып, алған автомобилін қайта өткізуге мүмкіндік беруге тиіс. Ол үшін көліктің жағдайы қалыпты болуы керек.
Яғни, автомобильді сатып алу мүмкіндігімен жалға алған адам қалған ақшасын төлемей-ақ қайтарып бере алады. Бірақ ол сома қалай есептелетіні шешілмеді.
Министрлік өкілдері қазір аталған өзгерістерді үкімет қарастырып жатқанын айтты.
Былтыр жазда билік жеңлдікті автокредит беруден бас тартқан. Шенділердің сөзіне сенсек, ол тиімді болмапты, ал бағдарламаға деп бөлінген ақша әр өңірдегі автобус паркін жаңартуға жұмсалады.
Комментариев: 0