Жедел жәрдем көлігіндегі камера, машина қыздыру және самокатқа қатысты шектеу

Жедел жәрдем көлігі мен автобустағы камера

25 маусымда жарияланған жаңа ережеге сәйкес Қазақстан полициясы жол қозғалысын бақылау және оның қауіпсіздігін қамтамасыз ету мақсатында автоматты режимде жұмыс істейтін техникалық құралдарды пайдалануға құқылы. Олар жол жүрісі мен автомобиль көлігі туралы заңды бұзғандарды анықтайды. Билік мұндай құрылығыны автомобиль жолдарына ғана емес, мемлекеттік органдар, жедел медициналық жәрдем қызметі және жолаушы мен жүк тасымалдаушылардың техникасына да орнатады.

Самокат пен электрлі велосипедке арналған шектеу

Ең маңызды жаңалықтардың бірі — электросамокаттың тротуар және жаяу жүргінші жолымен жүруіне тыйым салу. Осы мақсатта «Жол жүрісі туралы» заңның 57-бабына өзгеріс енді. Құжат тамыздың аяғында күшіне енген соң электрлі самокатпен тек веложолақта не жолдың шетімен жүруге болады.

Бензинді немесе электрлі қозғалтқышпен жабдықталған велосипедті де тротуарда тізгіндеуге болмайды. Енді олар мопед саналады, сондықтан міндетті түрде тіркеу керек. Жүргізу үшін куәлік қажет. Жаяу жүргінші жолымен тек гироскутер, сигвей, электрлі мотоскейтборд, монодөңгелек және соған ұқсас шағын электрлі көлік құралын мінетіндер қозғалады.

Электромобильге арналған мемлекеттік нөмір

Электромобильдер арнайы нөмір алады. Ол туралы нақты ақпарат жоқ, тек жасыл түсті болады деген болжам бар. Ішкі істер министрлігі электрокарға арнайы нөмірді жарты жылдан кейін бермекші. Осы уақыт ішінде жеткізуші жаңа нөмір әзірлеу технологиясын меңгереді.

Аулада көлік қыздыру

Енді аулада автомобиль қыздыруға болады. 54-баптың 4-тармағының 22-тармақшасындағы елді мекенде қозғалтқышы жұмыс істеп тұрған көлікті тұраққа қоюға қатысты тыйым күшін жойды.

Төленбеген айыппұлмен көлік тіркеу

Заң күшіне енгеннен кейін полиция айыппұл төлемеген азаматқа көлікті қайта тіркеу, жүргізуші куәлігін алу сияқты басқа мемлекеттік қызмет көрсетуден бас тарта алмайды. 23-баптың 1-тармағында 9-тармақша болмайды.

Денсаулығына байланысты көлік жүргізе алмайтындарды бақылау

Денсаулық сақтау министрлігі көлік басқаруға рұқсаты бар немесе жүргізе алмайтындар туралы мәліметті арнайы дерекқорға автоматты түрде енгізеді. ІІМ қызметкерлері базаға кіріп, көлік жүргізе алмайтын адамды анықтай алады.

Кім ұзақ уақыт куәлік ала алмайды

Жүргізуші куәлігі болмаса да, мас күйде көлік тізгіндегені үшін жауапқа тартылған азамат 7 немесе 8 жыл куәлік ала алмайды. Бұл Әкімшілік кодекстің 608-бабының 6 немесе 8-бөлігі, 613-бабының 8 немесе 11-бөлігі және Қылмыстық кодекстің 35-бабының бірінші бөлігі немесе 36-бабы бойынша жауапқа тартылғандарға қатысты.

Пилотсыз көліктер заңмен реттеледі

«Автомобиль көлігі туралы» және «Жол жүрісі туралы» заң өзгерді. Пилотсыз көлікті пайдалану ережесін ІІМ мен Көлік министрлігі бірлесіп әзірлейді.

Көлік министрлігі, жергілікті әкімдіктер мен жолға жауаптылар қауіпсіз жол инфрақұрылымын (асфальт, жол таңбасы мен белгілері, интернет және т.б.) дамыту және қамтамасыз ету, сонымен қоса пайдаланушылардың еркін жүріп-тұруына мүмкіндік беретін пилотсыз көлік құралын пайдалану аймағын ұйымдастыруға тиіс.

Қазақстандағы автомектептерге қойылатын талаптар да қатаңдайды.