«Жол жүрісі туралы» заңға енетін өзгеріс ертең, 25 тамыздан бастап күшіне енеді. Осы күннен бастап жалға алынған және жеке электросамокатпен тек арнайы веложолақта немесе жолдың шетінде жүруге болады. Жолда жүру үшін самокатшыда шлем және кез келген категориядағы жүргізуші куәлігі болуға тиіс. Қараңғы уақытта жарық шағылыстырғыш жилет немесе жарық шағылыстыратын киім кию қажет.
Жаяу жүргіншілер жолымен гироскутер, сигвей, электромотоскейтборд, монодөңгелек сияқты шағын электрлі көлік құралымен ғана жүруге болады. Самокаттың тротуармен жүруіне әкімдік рұқсат бере алады, бірақ үкімет Алматыда бұл мәселеге қатысты ешқандай құжат әзірге қабылдамады және талқыға шығармады.
25 тамыздан бастап билік қозғалтқышы бар (электрлі немесе бензинді) велосипедті мопедпен теңестіреді. Онымен де тротуарда және веложолақта жүруге тыйым салады. Мұндай көлікті тізгіндеу үшін мемлекеттік нөмір алып, тіркеуден өткізіп, сақтандыру қажет. Оны А1 жүргізуші куәлігі бар адам ғана басқара алады.
Аулада көлік қыздыруға салынған тыйым күшін жояды, электромобиль жасыл мемлекеттік нөмір (полиция оны жарты жылдан кейін бере бастауға уәде беріп отыр) алады. Үкімет жедел жәрдем мен қоғамдық көліктерге жол ережесін бұзғандарды тіркейтін камералар орнатуға рұқсат берді.
Комментариев: 0