Жапониялық Creative311 порталы Land Cruiser 300 өз елінде қалай сатылып жатқаны жайлы қызық ақпарат жариялады. Жол талғамайтын көлікті жапондар да өте жылы қабылдады, сол үшін компания екінші нарықтағы алыпсатарлықтан қорқып отыр.
Мұндай қауіптің бар екені рас. Мысалы, Қазақстанда модельдің ресми сатылымы 1 шілдеде басталғанымен, қазірдің өзінде Kolesa.kz-те сатылып жатқан жаңа «үш жүздік» аз емес. Олардың кейбірінің бағасы 60 миллион теңгеге жеткен, ал ресми дилерлерде ең қымбат нұсқасы 49.5 миллион теңге тұрады.
Жапонияда осындай жағдайдың алдын алу үшін жол талғамайтын көлікке алдын ала тапсырыс берушілер (22 мыңнан астам) қосымша келісімшартқа қол қояды. Құжатта автокөлікті қайта сатуға тыйым салынған. Нақты уақыт белгіленген жоқ, бірақ шектеу мерзімі шамамен бір жыл болуы мүмкін.
Creative311 ақпаратына сенсек, егер келісімшарт талаптары бұзылса, Toyota көлікті сатқан дилерлік орталықты да, сатып алушыны да жазалайды. Келісімді бұзған клиент болашақта Toyota көліктерін сатып ала алмайды. Сонымен қатар компания елдің түрлі аймағында Land Cruiser 300-ді көптеп сатып алған ұйымдарды да назарда ұстайды.
Toyota машиналарын жеңіл ақша табу мақсатында сатып алушыларды жақтырмайтын жалғыз бренд емес. Әдетте суперкар өндірушілер осындай тыйым енгізеді. Соның бір мысалы — Ford-тің GT моделі. 500 сатып алушы автокөлігін екі жыл бойы сатпауға міндеттелді. Бұл талапты атақты рестлер әрі актер Джон Сина елемегендіктен, «Форд» оны сотқа шақырып, 500 мың доллар өтемақы талап етті. Іс соттан тыс шешілді. Синаның қанша төлегені белгісіз, бірақ автоөндіруші ақшаны қайырымдылыққа жұмсаған.
Комментариев: 0