«Мемлекеттік реттеуге жататын өлшемдер тізімін бекіту туралы» бұйрыққа өзгеріс енді. Биыл 1 маусымда күшіне енетін құжатқа сай жанармай және автогаз құю бекеттері жанармай есептегішін тұрақты түрде тексертіп отыруға міндетті. Егер бекеттер тексерістен өтпеген құрылғымен жанармай құйғаны анықталса, Әкімшілік кодекстің 419-бабы бойынша жеке жанармай бекеті басшысына 230 АЕК (793 500 теңге), орташа жанармай желілеріне 310 АЕК (1 069 500 теңге), ірі желілерге 1 600 АЕК (5 520 000 теңге) айыппұл салынады.
Бұйрыққа сай бензин мен дизель құйғанда ең көп болғанда ± 0.4 %, ал газдан ±1 % қателесуге болады. Осы шектен асса жанармайды кем құйған болып саналады.
«Мысалы, жүргізуші 30 литр бензин алса, колонкадағы қателік 120 мл-ден аспауы қажет», — деді Сауда және интеграция министрлігі техникалық реттеу және метрология комитетінің төрағасы Қуаныш Елікбаев. Оның айтуынша енді жүргізушілер бекет колонкасы мөлшерден аз отын құяды деп алаңдамай жанармай сатып алады.
Жанармайды аз құйғаны үшін бекет басшылары ғана емес, оларға иелік ететін компания да жазаланады. Бірақ жаза аса қатаң емес. Әкімшілік кодекстің 190-бабына сәйкес сауда қызметін ұсынатын не қызмет көрсетумен айналысатын кәсіпкер немесе ұйым (ішінде жанармай бекеті бар) тұтынушыны өлшеу немесе өзге де жолмен алдаса, жеке тұлға — 10 АЕК (34 500 теңге), шағын кәсіпкерлік субъектісі — 20 АЕК (69 000 теңге), орта кәсіп иесі — 30 АЕК (103 500 теңге), ірі кәсіп субъектісі 50 АЕК (172 500 теңге) айыппұл төлейді.
Мұндай әрекет бір жыл ішінде қайталанса, айыппұл мөлшері артады. Ірі желі үш жылға дейін лицензиясынан айырылуы мүмкін.
Комментариев: 0