Toyota компаниясының Қазақстандағы өкілдігі Санкт-Петербургте құрастырылған жаңарған Camry-дің бағасын жариялады. Біздің елге арналған автокөлік 2021 жылы наурыздың соңында ұсынылған. Машина сырттай сәл өзгеріп, жаңа мультимедиа кешені қойылды. Сонымен қатар 2 және 2,5 литрлік жаңа мотор орнатылды. Біріншісі автоматпен емес, вариатормен жұптасады, ал екіншісі 8 сатылы қораппен жұмыс істейді.
Бағалар жайлы айтсақ, «Стандарт» деп аталатын 2.0 литрлік қозғалтқышы бар базалық нұсқадағы автомобиль 300 мың теңгеге қымбаттады. Бұрын аталған көлік 11,5 миллион теңге болса, қазір 11,8 миллионға жеткен.
2,5 литрлік моторға ие машинаның бағасы 13,5-16,6 миллион теңге аралығында. Бұрын бұл модель 13,1-16,1 млн теңгеге сатылған. Ал капот астында 3,5 литрлік V6 қойылған «Люкс» комплектациясындағы Camry-дің бағасы 20,2 миллион теңгеден басталады. Camry 3.5 рестайлингке дейін 19,9 миллион теңгеге бағаланған еді.
GR Sport нұсқасындағы көлік жайлы да айта кеткен жөн. S-Edition комплектациясы қазір осылай аталады. Яғни, автомобильдегі айырмашылық тек сыртқы көрінісінде ғана. Ол қара төбесімен, жүксалғыш қақпағындағы спойлерімен, декоративті қосымшаларымен және қызыл жіппен тігілген салон қаптамасымен ерекшеленеді. Капот астында 2,5 литрлік мотор қойылған. Бағасы 15 040 000 теңгеден 15 480 000 теңгеге өсті. Сонымен қатар спорттық Camry-ге V6 моторын тапсырыспен орнатуға болады. GR Sport 3,5-тің бағасы 19 миллион теңге.
Комментариев: 0