Жаңарған кроссовердің интерьерін көрсететін бірнеше тизер мен жеке презентациядан кейін Porsche рестайлингтен өткен Cayenne және Cayenne Coupe моделі жайлы толық ақпарат берді.
Сырт пішінінде үлкен өзгеріс байқалмайды. Компания автомобильдің оптикасы ғана емес, шанақ панелі де өзгергенін айтады. Қанаты, капоты және бампері жаңарды.
Ал салонда жаңалық көп. Алдыңғы панельдегі үш экран бірден көзге түседі. Диагоналі 12.6 дюйм болатын имек аспаптар панелі, ортада 12.3 дюймдік дисплей және жолаушы алдында 10.9 дюймдік тачскрин орналасқан. Соңғысын опция ретінде ұсынады, одан навигацияны басқарып, видео қоюға болады. Арнайы бүркеніштің арқасында жүргізуші экранда не қойылып тұрғанын көре алмайды. Сондай-ақ автомат қорап селекторы ортаңғы консольден алдыңғы панельге ауысты.
Ең қарапайым Cayenne әлі де 3 литрлік V6 турбомотормен жүреді, бірақ ол қазір 353 ат күшін береді, бұл рестайлингке дейінгі нұсқадан 13 күшке көп, ал айналу моменті 50 Нм артып, 500 Нм болды. Кроссовердің гибрид түрленімінің қуаты өзге электромотордың арқасында 8 күшке артты (470 ат күші). Сондай-ақ жаңа батареяның арқасында жүріс қоры көбейді, қазір машина электрлі режимде 90 км жол жүреді.
Ал Cayenne S енді V6 емес, қосарлы турбоүрлемді V8 мотормен жүреді. Агрегат 474 ат күшіне ие, бұл бұрынғы Cayenne S қуатынан 34 күшке көп. Айналым моменті 50 Нм артты. Ең үздік Cayenne Coupe Turbo GT енді 659 ат күшіне (+19 күш) ие болады.
Porsche өзгерістер тізімінде жаңа пневматикалық аспа мен жаңарған PASM жүйесі бар екенін хабарлады. Оларды Turbo GT-ден өзге нұсқаларға опция ретінде ұсынады.
Машина бағасы АҚШ-та 80.8 мың доллардан басталып, 198 мың долларға (Turbo GT) жетеді. Оның үстіне бұл әр түрленімнің бастапқы бағасы. Модель биыл жазда клиенттер қолына тие бастайды.
Комментариев: 0