Жаңарған Porsche Cayenne салонында үш дисплей болады

Porsche рестайлингтен өткен Cayenne-ді 18 сәуірде таныстырады. Автоөндіруші әзірше кроссовер интерьерін ғана көрсетті.

Суреттен автомобильге 12.6 дюймдік имек аспаптар панелін, 12.3 дюймдік медиакешен экранын, сонымен қатар жолаушы алдында көлемі 10.9 дюйм болатын қосымша дисплей орнататынын байқауға болады. Соңғы тачскринді марка опция ретінде ұсынады.

Назар аударатын тағы бір нәрсе — ортаңғы консольде көз үйренген автомат қорап селекторының болмауы. Инженерлер иінтіректі шағын ауыстырып-қосқышқа алмастырып, медиажүйе экранының сол жағына қойыпты.

Консольде енді жаңа климат-бақылау блогы орналасады. Бұл сенсорлы жауап беретін және мультимедианы басқаратын шайбасы мен бірнеше металл батырмасы бар тач-панель. Одан жоғарырақ жабылатын қуыс тұр, онда сымсыз қуаттағыш пен USB-C порты бар.