Бірнеше күн бұрын Dacia жаңарған кроссовердің алғашқы тизерін көрсетті. Ал енді румыниялық бренд Duster-дің ірі суретін жариялап, сатылымға қашан шығатынын хабарлады. Автокөлік Еуропада қыркүйекте сатыла бастайды.
Рестайлингтен өткен Duster-ді жарықдиодты шамдарынан, Y тәрізді жүріс шамы мен жаңа дизайндағы артқы оптикасынан танисыз. Машина соңғы «Логан» мен «Сандеро» стилінде жасалыпты. Компания өкілдері экстерьердегі өзгеріс модельді жаңартып қана қоймай, оның экологияға зиянын да азайтқанын айтады. Аэродинамикасын жетілдіру ауаға тарайтын CO2 мөлшерін 5.8 граммға азайтуға ықпал етті.
Интерьері онша өзгермеген. Салонда 1.1 литрлік ұсақ-тұйек салатын жәшігі бар шынтақ тірегіш пен бірнеше USB-порт пайда болды. Қымбат нұсқаларына 8 дюймдік экраны бар медиажүйе орнатылады. Ол Apple CarPlay және Android Auto-мен жұмыс істейді, сонымен қатар Wi-Fi тарата алады.
Капот астына 150 ат күшіне ие TCe 150 турбомоторы орнатылған машина үшін екі іліністі робот қолжетімді. Ал қалған күштік құрылымдар (1 литрлік TCe 90, 1.3-литрлік TCe 130, 1.5 литрлік дизельді dCi 115 пен биоотын тұтынатын TCe 100 ) тек механикамен ұсынылады.
Рестайлингтен атауында Dacia қосымшасы бар Duster ғана өткенін айта кеткен жөн. Қазақстанда жүрген жол талғамайтын көліктер Мәскеуде Renault маркасымен шығарылады. Олардың өңі өзгермейді, себебі біздің елге биыл ғана келді, ал румыниялық машиналар 2017 жылдан бері сатылып жатыр.
Комментариев: 0