Жаңа Subaru Forester Қазақстанға келді

Subaru жаңа Forester-ді біздің елде ресми таныстырған жоқ, бірақ марка өкілдері бағасын атап, комплектациясына қатысты ақпарат берді және тапсырыс қабылдауға дайын екендерін хабарлады.

SL9 индексті кроссовердің ұзындығы — 4655 мм, дөңгелек базасы — 2670 мм. Ол бізге жақсы таныс 185 ат күші мен 247 Нм момент беретін 2.5 литрлік бензинді мотормен (FB25) жүреді. Агрегат бұрынғыдай Lineartronic вариаторымен және толық жетек жүйесімен жұмыс істейді.

Бренд барлық нұсқасына EyeSight ассистенттер кешені мен шолу мүмкіндігі жоғары камера және қауіпсіздік жастығын орнатады. Қымбатырақ түрлеріндегі электрондық көмекшілер құрамында артқа қозғалғанда автотежеу, жүргізушінің жағдайын бақылау функциялары болады.

1 / 5

• 
• 
• 
• 
• 

1 / 5

Модельдің елдегі ең арзаны — Elegance. 23.2 млн теңге тұратын автомобиль 18 дюймдік дөңгелек дискісі, матамен қапталған кресло, күңгірттелген артқы әйнек, кілтсіз ашу жүйесі, артқы орындықтардың электр жетегі, 11.6 дюймдік экраны бар медиажүйе, климат-бақылау, шина қысымының сезгектерімен және бір режимді X-Mode-пен жабдықталады. Компания оған қарапайым EyeSight қояды.

Модельдің ешбір модификациясында қысқы пакет жоқ. Прайс-лист жасағанда ұмыт қалса керек, себебі бесінші буын біздің елде жылытқыштармен сатылады. Оның бағасы 20.4 млн теңгеден басталып, 24.3 миллионға дейін барады.

1 / 8

• 
• 
• 
• 
• 
• 
• 
• 

1 / 8

Prestige-дің құны — 24.4 млн теңге. Жүксалғыш есігі электр жетекті машина EyeSight кешенінің бейімді круиз-бақылау, жолақта ұстау, автотежеу, көрінбейтін аймақтарды бақылау және басқа көптеген функциясынан тұратын толық жинағына ие.

Sport нұсқасын (24.9 млн теңге) өзгеше дөңгелек дискісі мен тек өзіне тән интерьер әрлеуінен танисыз. Автомобиль қос режимді X-Mode-пен толыққан.

Forester-дің Қазақстандағы ең үздік нұсқасы Premium деп аталады. 26.4 млн теңге тұратын көлік былғарымен қапталған кресло, электр жетекті люк, шатырындағы біртұтас рейлингтер, сымсыз қуаттағыш және Harman Kardon аудиожүйесімен ерекшеленеді.