Geely Galaxy TT cпортседаны Қытайда саудаға шықты

Компания 10 қыркүйекте батареялы Geely Galaxy TT седанын Қытайда ресми түрде сата бастады. Алғашқы 15 минуттың ішінде 10 мыңнан астам тапсырыс түсті.

Дөңгелек базасы 2.9 метр болатын бес метрлік Galaxy TT жылдам қуатталатын 800 вольттық платформаға негізделген. Шассидің алдыңғы бөлігінде алюминийден жасалған қос көлденең иінтіректі аспа, артында бес иінтіректі аспа тұр. Базалық түрленімнің өзінде бейімді амортизаторлар бар. Үздік модификация жол төсемін камералар арқылы бақылап отыратын Magic Carpet жүйесін алады.

1 / 5

• 
• 
• 
• 
• 

1 / 5

Бір моторлы нұсқалар артқы осьтегі 330 ат күшіне ие электромотормен жүреді. Алғашқы жүздікті 6.5 секундта еңсереді, ең жоғары жылдамдығы — 201 км/сағ. WLTP циклі бойынша жүріс қоры 518 шақырымға жетеді. Жалпы қуаты 570 ат күшіне тең екі моторы бар толық жетекті автомобиль 3.8 секундта жүзге дейін жылдамдық алады. Максимал жылдамдығы — 210 км/сағ, жүріс қоры — 527 км. Бәрі CATL-дың 63.8-75.2 кВт·сағ LFP батареясымен жабдықталады. Жылдам қуаттау бекетінде аккумуляторын 10-нан 80 %-ға дейін 11 минутта толтыруға болады.

Салонда Galaxy E8-дегідей 45 дюймдік моноэкран жоқ. Оның орнын 10.2 дюймдік аспаптар панелі мен дауыспен басқарылатын Eva көмекшісі бар Flyme Auto 2 мультимедиа жүйесінің 15.4 дюймдік сенсорлы экраны басты. Жабдықтар тізіміне толыққан шынайылық әсеріне ие проекциялық дисплей (25.6 дюйм) мен 23 динамикті аудиожүйе де кіреді.

1 / 10

• 
• 
• 
• 
• 
• 
• 
• 
• 
• 

1 / 10

Компания автономды жүргізу жүйесіне ерекше назар аударды. Барлық Galaxy TT лидар, үш қарапайым радар және 11 камера алды. Базалық түрленімдер Horizon Robotics J6M чипін пайдаланса, Ultra-да қуаттырақ Nvidia Drive Thor чипі тұр. Ол нүктеден нүктеге дейінгі автономды жүргізу және автоматты тұраққа қою (түнде де жұмыс істейді) функциясына ие.

Моножетекті Geely Galaxy TT-дің бағасы 129 900-159 900 юань (8.7-10.74 млн теңге) аралығында. Екі моторлы Ultra 185 900 юань (12.5 млн теңге) тұрады.