Жаңа Mercedes-Benz платформасы Geely технологиясымен жасала ма?

Кейінгі кезде әлемдегі көптеген автоөндіруші технологиялық шешімді Қытай компанияларынан ала бастаған. Осы тізімге енді Mercedes-Benz те қосылатын сияқты.

36Kr басылымы өз дереккөзіне сілтеме жасап хабарлағандай, неміс бренді шағын автомобильге арналған жаңа платформа әзірлеуді Қытайдағы зерттеу орталығына тапсырған. Ол MMA-дің орнын басады.

Ең қызығы, Phoenix кодтық атауын алған жобаға Geely GEEA электрлі архитектурасы донор болуы мүмкін. Geely мен Mercedes-Benz автомобиль электроникасы (электрондық көмекшілер мен медиатехнологияны қамтиды) бағытында серіктес болады деген ақпарат бар.

Басылым дереккөзі таратқан ақпаратқа сүйенсек, неміс бренді қазір Geely GEEA (4.0 сериясы) платформасына негізделген концептіні сынақтан өткізіп жатыр. Ол дәстүрлі мотормен жүретін машинаға да, электромобильге де арналған.

Жаңа платформа нарыққа 2030 жылға дейін шығады деген болжам бар.