2017 жылдан бастап Францияда автомобильді тіркеу (Carte Grise алу — біздегі Көлік құралын тіркеу куәлігінің баламасы) сатып алған соң 30 күн ішінде ANTS мемлекеттік сайты немесе жеке делдалдар (автосалон мен арнайы сервистерді қоса алғанда) арқылы онлайн жүзеге асады. Соңғылары SIV (Système d’Immatriculation des Véhicules) жүйесінің көмегімен реестрге тікелей қол жеткізе алады, бірақ олардың көбі адал жұмыс істемегені белгілі болды.
Франция Есеп палатасының наурыздағы есебіне сәйкес жүйені «жекешелендіру» ауқымды алаяқтыққа жол ашқан. Аудиторлар бұзылған немесе жалған аккаунттар арқылы миллионға жуық машина заңсыз рәсімделгенін анықтапты. Салдарынан 2022–2024 жылдары мемлекет қазынасына 550 млн еуро түспей қалған деп жазды Carscoops. Бұл шешім өзге де проблемаларға жол ашқан, мысалы, ұрланған көлікті есепке қоюға мүмкіндік туып, жол ережесін сақтамағандарға айыппұл салу қиындаған.
Жүйенің киберқауіпсіздігі мінсіз емес екен. Хакерлер сертификаты бар делдалдардың SIV жүйесін бұзып кіріп, бір түннің ішінде ондаған жалған техпаспорт шығарған жағдайлар тіркелген.
Есеп палатасы жауапты мекемелерден онлайн-базаны қатаң қадағалап, ауқымды дерекпен жұмыс істейтін операторлардың қызметін тұрақты бақылауды талап етті.
Комментариев: 0