Hyundai Accent-тің жаңа буыны камуфляжсыз фототыңшылар көзіне түсті. Autocar India және Money Control басылымы седанның Оңтүстік Кореяда түсірген суреттерін жариялады. Фотода Accent бірнеше қырынан анық көрінген. Жаңа өнімнің тұсаукесері 21 наурызда Үндістанда өтеді, ол елде машина Verna деп аталады.
Фотосуреттен Accent-тің арт жағы Elantra стилінде жасалғаны байқалады. Жарық техникасы түпнұсқа болады. Седанның артқы шамы диодты, екі шам арасын модель атауы жазылған қосымша жарық жолақ жалғап тұр.
Сондай-ақ артқы бампердің төмен жағы қара түсті диффузор мен қосымша стоп-сигналы бар шанақ түстес бөлік бірігіп ерекше дизайнда жасалыпты. Бірақ мұндай дизайнды Hyundai кейбір елде ғана қолдануы мүмкін.
Компания Үндістанда седанға алдын ала тапсырыс қабылдап жатыр, Accent/Verna-ны 1.5 литрлік екі түрлі мотормен ұсынады. Базалық нұсқасы бұрынғыдай 115 ат күшіне ие 1.5 литрлік атмосфералы мотормен жүреді, ал қымбат нұсқасына 160 ат күшіне ие жаңа турбомотор орнатады, ол 6 сатылы механика немесе 7 диапазонды роботпен жұмыс істейді.
Жаңа Hyundai Accent-тің сырт пішіні қандай болатынын бұған дейін жарияланған ресми дизайнерлік скетчтен көргенбіз. Седанда жаңа радиатор торы, спорттық бампер, Grandeur стилінде капотты бойлай орналасқан жарық жолақ және Elantra стилінде салынған бедерлер болады.
Комментариев: 0