Zeekr 007 универсалын батареялы Audi және Porsche-мен бірге сынақтан өткізді

Zeekr вице-президенті Чжу Лин әлеуметтік желіде 007 GT универсалының сынақтан өтіп жатқан суретін жариялады. Фотосуретте электрокар Porsche Taycan Cross Turismo және Audi RS e-tron GT-мен бірге тұр. Zeekr осы арқылы 007 GT Германия электромобильдеріне бәсекелес болатынын меңзеп отыр.

Zeekr 007 универсалы өз елінде биыл көктемде саудаға шығады. Компания электрокардың сериялы нұсқасын сәуірде өтетін Шанхай автосалонында көрсетеді. Кейінірек модель Zeekr 7 GT деген атаумен Еуропаға жол тартады. Марка Еуроодақта жақсы өтеді деп болжап отыр.

1 / 4

• 
• 
• 
• 

1 / 4

007 GT-дің седаннан басты айырмашылығы шанақ типінде ғана. Бір модельдің екі нұсқасының өлшемі мен техникалық сипаттамасы бірдей. Zeekr 007 GT Қытайда екі түрлі күштік құрылыммен сертификат алды. Базалық модель 422 ат күшіне ие бір мотормен жүреді, қымбатырақ түріне 224 ат күшін беретін тағы бір қозғалтқыш орнатылады. Ең қуатты универсал 2.85 секундта жүзге дейін жылдамдық алады. Сыйымдылығы 75 және 100 кВт⋅сағ екі түрлі аккумулятор бар, машинаның жүріс қоры 825 км-ге жетеді.

Универсал 15 дюймдік дисплей мен 21 динамикті медиажүйе, климат-бақылау, панорамалы шатыр және лидар мен ондаған сезгегі бар электронды көмекшілер жинағымен жабдықталған. Қытайда жаңа өнім седаннан сәл қымбат тұрады, бағасы 210 мың юаньнан (15 млн теңге) басталады, Еуропада 007 GT-ді 50 мың еуроға (26 млн теңге) алуға болады.