Tesla мен Lucid-те жұмыс істеген мамандар электрлі спорткар шығарады

Британияның Longbow стартапы Roadster және Speedster модельдерінің алғашқы суретін жариялады. Олар спорткар өндірісінің ұлттық дәстүрін жаңғыртады, бірақ екі көлік те электрлі болады. Стартаптың негізін бұрын Tesla мен Lucid-те жұмыс істеген инженерлер қалаған.

Longbow көз тартатын дизайнынан бөлек жүргізгенге жайлы, динамикасы жақсы болады. Жоба авторлары динамикасын жақсарту үшін машина құрылымын жеңілдетуді жоспарлап отыр. Мысалы, шатыры жоқ сериялы Longbow Speedster-дің салмағы 900 келіден аспайды. Roadster купесі бір тоннаға жуықтайды.

Мамандар спорткарға арнап алюминий мен композиттен жасалған түпнұсқа шасси әзірлеп, шағын мотор мен батарея таңдады. Ал техникалық сипаттамасынан машинаның 3.5 секундта жүзге дейін жылдамдық алатыны және жүріс қоры 440 км екені ғана белгілі. Қолда бар ақпаратқа сүйенсек, спорткардың базалық нұсқасы 340 ат күшіне ие бір қозғалтқышпен жүреді.

Компания жаңа өнімдерге тапсырыс қабылдап жатыр, бағасы белгілі. Longbow Roadster — 65 мың фунт (41 млн теңге), ал Speedster одан 20 мың фунт қымбат (54 млн теңге) тұрады. Әр модельдің 150 экземпляры ғана шығады. Жұмыс прототипін — биыл жазда, ал сериялы нұсқаны 2026 жылы ұсынады

Автомобильдерді жасауға Tesla Model 3 өндірісіне атсалысқан Дэниэл Дейви және Tesla, Lucid және BYD компанияларында қызмет еткен Марк Тапскотт жетекшілік етеді. Қаржы және экономика жағына X Shore электрлі қайық фирмасының бұрынғы басшысы Дженни Кейс жауапты болады.