Өткен ғасырдың бірінші жартысында люкс көлікті әрлеу автоөндірушілердің бастамасымен жүзеге асатын. Зауыт жүріс бөлігі мен қозғалтқышын, беріліс қорабын және басқару органын арнайы шеберханаға жолдайтын, ондағы мамандар құрастырып, тапсырыс берушіге жіберетін. Рамалы шасси шексіз тәжірибе жасауға мүмкіндік берді.
Шанақ жасайтын шеберханалардың атауы әлі күнге дейін танымал. Автоклассика байқауына қатысушылардың атақ-абыройын сөз еткенде Brunn, Barker, Erdmann & Rossi, Bohman & Schwartz, Voll & Ruhrbeck, Rollston мен Park Ward, Fleetwood пен Franay ерекше құрметпен аталады. Әріптестерінің арасында (400-ден астам) Париждегі Saoutchik ательесі көш басында болды. Олар еуропалық және америкалық бренд автомобильдерінен көркем өнер туындысын жасай отырып, батылдық пен қиял талап ететін сәнді ар-деко стилін қолданған. 1950 жылдардың басында шанақ жасауға сұраныс азайып, шеберхана жабылып қалды.
Жетпіс жылдан кейін түрік автодизайнері Угур Сахин (Ugur Sahin) мен немістің Pogea Racing тюнинг компаниясы бұл брендті қайта жаңғыртуға бел буып, анонс ретінде Saoutchik 300 GTC купесінің суретін көрсетті. Әйгілі Gullwing стилінде жасалған купе жаңа Mercedes SL-ге негізделген.
Угур мен оның серіктестері Saoutchik атауын қолдана отырып, осы брендтің мұрасын жарнама мақсатында, сондай-ақ жаңа жобаға қосымша сән және салмақ қосу үшін заңды түрде қолдана алады. Олар бұл брендті Bugatti сияқты жоғары технологиялы деңгейге шығара алмайды, себебі олардың ондай мүмкіндігі де, жоспары да жоқ сияқты.
Айтпақшы, Жак Савчиктің шын есімі — Яков Савчук. Ресейден шыққан ағаш шебері Парижге көшіп барғаннан кейін өзін жаңа салада сынап көрмек болды. Ол өз есімінің французша нұсқасын пайдаланған.
Комментариев: 0