Honda мен Nissan альянсы әлемдегі ең ірі автоконцерндердің бірі болмайды. Yomiuri Shimbun басылымы дереккөздеріне сілтеме жасап, үшінші тарап — Mitsubishi альянсқа қосылмау туралы шешім қабылдапты, бұл туралы ақпанның басында ресми түрде мәлімдейді деп жазды.
Honda мен Nissan холдинг құру жоспарын желтоқсанның аяғында жариялап, меморандумға қол қойды. Сол кезде екі өндіруші күш-жігерін біріктіру арқылы қиындықтарға төтеп беріп, әлем автоөнеркәсібіндегі түбегейлі өзгерістерге бейімделе алатынын атап өтті. Mitsubishi альянстың үшінші мүшесі болатын, бірақ компания басшылары бұл бірлестіктегі рөлін қаңтардың аяғына дейін айтуға уәде берген.
Енді Mitsubishi альянсқа қосылмайтыны белгілі болды. Дегенмен компания Honda және Nissan-мен ынтымақтастықты нығайтуды жоспарлап отыр. Серіктестерінің алдында міндеттері болмаса, Mitsubishi Оңтүстік-Шығыс Азия нарығында оңай шешім қабылдай алады, өйткені бренд бұл өңірде жақсы орныққан. Оның нарықтағы құнын ескерсек, Mitsubishi альянс құрамында бағынышты болар еді.
Nissan қаржылық қиындықтарды бастан өткеріп жатқандықтан, жағдайы тұрақсыз. Компания АҚШ-тағы екі кәсіпорнындағы екі мыңдай адамды жұмыстан шығарып, өндірісті қысқартуға дайындалып жатыр.
Mitsubishi холдингке кірмесе де, Nissan-мен байланысын үзбейді, өйткені брендтің шамамен 24 % акциясы Nissan-ға тиесілі. Nissan-ның шамамен 35 %-ына Renault иелік етеді. Бірнеше апта бұрын француз концерні Honda мен Nissan-ның бірігу процесіне араласпайтынын мәлімдеді.
Комментариев: 0