XCITE алғашқы моделін таныстырды. Ол — Chery Tiggo 7 Pro

Санкт-Петербургтегі бұрынғы Nissan зауытынан шығатын өнімдер үшін арнайы жасалған XCITE бренді X-Cross 7 деп аталатын тұңғышын таныстырды. Атауы басқа болғанымен, көлік ЕЭО-да Chery Tiggo 7 Pro ретінде танымал.

Модельдің басты айырмашылығы — шанақтағы тақтайша мен рөлдегі белгі. Алдыңғы жетекті 4.5 метрлік кроссовер 147 ат күшін (210 Нм) беретін 1.5 литрлік турбомотормен үйлесімді вариатормен жабдықталады.

Салонда 7 дюймдік аспаптар панелі мен 10.25 дюймдік мультимедиа экраны бар. Климат-бақылау жүйесін сенсорлы панель арқылы басқаруға болады. Базалық жабдықтар тізіміне кілтсіз ашу жүйесі, электр жетегі бар жүксалғыш есігі, қозғалтқышты қашықтан қосу, жарықдиодты оптика, алдыңғы және артқы орындықтарды, алдыңғы әйнекті, рөлді, сыртқы айналарды және әйнек жуғыш бүріккішін жылыту, сонымен қатар сымсыз қуаттау, екі аймақты климат-бақылау жүйелері, жүргізуші көмекшілерінің ауқымды жинағы және т.б. кіреді.

Компания автомобильдің комплектациясы мен құны туралы ақпаратты кейінірек береді. «Автозавод Санкт-Петербург» кәсіпорнының бас директоры Иван Мироновтың айтуынша, өндіріс орнында кроссовердің алғашқы партиясы жасалды. Модель биыл көктемде саудаға шығады.

Бұған дейін Санкт-Петербургтегі зауыт өңі өзгерген Bestune T77-ні құрастырып, Lada брендімен сатуды жоспарлаған еді. Алайда бұл жобаны тоқтатуға тура келіп, дайын Lada X-Cross 5-тің 170 данасы қызметтік көлік болды.