Volkswagen компаниясы Taos-тың бағасын жариялады. Ол марканың ең кішкентай кроссовері, ұзындығы небәрі 4.4 метр. Автокөліктің Škoda Karoq-пен ұқсас тұстары көп. Taos Нижний Новгородтағы ГАЗ зауытында шығарылады.
Taos Ресейдегі секілді біздің елде де төрт жиынтықта сатылады: Respect, Status, JOY! және Exclusive.
Ең арзан Respect 110 ат күші бар 1.6 литрлік MPI атмосфералы моторымен қозғалады. Ол 5 сатылы механикамен жұмыс істейді. Машина алдыңғы жетекті болады. Базалық Taos-та жарықдиодты шам, алты қауіпсіздік жастығы, цифрлы аспаптар панелі, алдыңғы орындықтарды жылытқыш, салқындатқыш, бейімді круиз-бақылау, орталық консольдегі бірнеше USB-C порты және 6.5 дюймдік мультимедиа кешені бар. Мұндай кроссовер 10.6 миллион теңге тұрады.
Status, JOY! және Exclusive жиынтығындағы көліктерге тек 150 ат күшіне ие 1.4 литрлік турбомотор орнатылады. Алдыңғы немесе толық жетекті нұсқасын алуға мүмкіндік бар. Алғашқысында агрегат 8 сатылы автоматпен, ал екіншісінде 7 сатылы роботпен (DQ381) жұмыс істейді. Толық жетек үшін қосымша 600 мың теңге мөлшерінде ақша төлеу керек.
Status 12.2-12.7 миллион теңге аралығында сатылады, ал JOY! 12.7-13.3 млн теңгеге бағаланып отыр.
Қазақстандағы автосалондарда сатылатын ең үздік жиынтық — Exclusive. Мұндай кроссовер жарықдиодты шам, 10 дюймдік экраны бар аспаптар панелі, алдыңғы және артқы орындықтарды жылытқыш, алдыңғы камера және өзге де көптеген пайдалы қосымшалармен жабдықталған. Ең қымбат Taos-тың алдыңғы жетекті нұсқасы 13.3 миллион, толық жетекті нұсқасы 13.8 миллион теңге тұрады.
Ол біздің нарықта Hyundai Creta (7.5-9.4 млн теңге), Kia Seltos (10.8-11.5 млн теңге) және екінші буындағы Renault Duster-ге (7.2-10.4 млн теңге) бәсекелес болады.
Комментариев: 0