Вакцина алмаған такси және автобус жүргізушілері рөлге отырмайды

ҚР бас санитар дәрігерінің жаңа қаулысы шықты. Онда қызметкерлері коронавирусқа қарсы екпе алмаса, 15 шілдеден бастап жұмысқа келуіне тыйым салынатын мекемелердің тізімі жарияланды.

Жаңа шектеу төмендегі ұйымдардың/мекемелердің COVID-19-ға қарсы вакцина алмаған қызметкерлерін (тұрақты медициналық қарсы көрсетілімі бар және соңғы үш айда коронавирустан айыққан адамдарды қоспағанда) қамтиды:

• халыққа қызмет көрсету орындары (тізім ұзақ, онда ТЖО мен дөңгелек ауыстыру орталығы арнайы көрсетілмегенімен, қаулыдағы «басқа объектілер» санатына кіреді);
• базарлар, сауда үйлері, ойын-сауық орталықтары, дүкендер, супермаркет және гипермаркеттерді қоса алғанда, өнімдер мен тұтыну бұйымдарын көтерме және бөлшек сататын орындар (бұл санатқа көлік базарлары, автосалондар және қосалқы бөлшек дүкендері кіреді);
• жолаушы тасымалдайтын ұйымдар, әуежайлар, теміржол, автомобиль және су бекеттері, өзен және теңіз порттары, автовокзалдар/автоөткелдер, жолаушыларға қызмет көрсету орындары (такси, автобус жүргізушілері, автовокзал және автостанция жұмысшылары т. б.);
• тіршілікті қамтамасыз ету нысандары және коммуналдық қызметтер (жанармай құю бекеті қызметкерлеріне қатысты).

Қаулы 15 шілде сағат 00:00-де күшіне енді.

Қызметкерлерге вакцинаның алғашқы компонентін егу 2021 жылы 10 тамызға дейін, ал екіншісін егу 1 қыркүйекке дейін ұйымдастырылады.

Бұған дейін дәрігерлер қарапайым азаматтардың жазаланбайтынын, бірақ вакцина алмаған қызметкердің жұмысқа келуіне рұқсат берген басшылық пен кәсіпкерге айыппұл салынатынын айтқан.

ҚР Әкімшілік кодексінің 462-бабы 3-тармағына сәйкес, мемлекеттiк бақылау және қадағалау органдары, мемлекеттік органдардың лауазымды адамдары өздерінің құзыретi шегiнде шығарған заңды талаптарды немесе нұсқауларды, ұсыныстарды, қаулыларды орындамағаны немесе тиiсiнше орындамағаны үшін:

• жеке тұлғаларға 5 АЕК (14 585 теңге);
• лауазымды адамдарға 15 АЕК (43 755 теңге);
• шағын кәсіпкерлік немесе коммерциялық емес ұйымдарға 100 АЕК (291 700 теңге);
• орта кәсіпкерлерге 200 АЕК (583 400 теңге);
• ірі кәсіпкерлерге 500 АЕК мөлшерінде (1 458 500 теңге) айыппұл салынады.