Утильзауыт жабық, бірақ утиль алымы төленіп жатыр. Билік не дейді?

Бір ай бұрын «Ақ жол» фракциясы мәжілісмендері үкіметке ескі автомобильдерді қайта өңдейтін «Recycling Company» ЖШС зауытының жұмысы тоқтап тұрған кезде утиль алымын төлемеуді ұсынып, сауал жолдаған. Мекеме қызметіне былтырдан бері шектеу қойылып, жабық тұр. Зауыттың экс-басшылары «Оператор РОП» мен бұрынғы экология вице-министрі 13 млрд теңге жымқырды деп айыпталды.

Ақ жағалылар 4 %-дық автонесие беруді утиль алымынан түскен игерілмеген қаражат есебінен жалғастыруды ұсынды. Бұдан бөлек зауыт жұмыс істемей тұрғанда автомобиль мен техника үшін жиналған ақшаның қайда жұмсағаны туралы мәлімет жариялап, кәсіпорын қашан ашылатынын хабарлауды сұрады.

Депутаттардың утиль алымын төлемеу туралы ұсынысына премьер-министрдің орынбасары Роман Скляр былай деді: «бұл мүмкін емес, себебі Экологиялық кодекске сәйкес өндірушілердің кеңейген жауапкершілігі қоршаған ортаны қорғау механизмдерінің бірі болып табылады».

Вице-премьер автонесиені қосымша қаржыландыру мүмкін емес екенін, бұл бағдарлама қайта қаралып жатқанын және келешекте автобус сатып алу үшін қаржы бөлінетінін айтты.

Елімізде утиль алымы ретінде жиналған қаржы қайда кетті деген сұраққа Скляр мырза әдептілікпен жауап беріп, депозитарий сайттары мен «Жасыл дамудың» өз сайтында жарияланған былтырғы қаржы есебімен танысуға кеңес берді.

2022 жылы авто жеткізушілер мен құрастырушылардан утиль алымы ретінде қанша ақша жиналды, ол қайда жұмсалды және көлік құрастыратын мекеменің әрқайсысы қанша пайда тапты деген сұрақтарға Kolesa.kz редакциясы Экология министрлігінен былтыр наурыздан бері мардымды жауап ала алмай келеді. Шенділер жолданған сауалдарға Экология кодексіне сілтеме жасап жауап береді, ал отандық автоөнеркәсіп кімге және қанша жұмсағаны коммерциялық құпия деп құтылды.

«Оператор РОП-тың» қамалған басшылары импорттаушылардан қанша ақша алып отырғанын жариялаудан еш қорықпапты. Сонда Экология министрлігінің коммерциялық құрылымға айналғаны ма?

Ал Роман Скляр айтқан «Жасыл дамудың» есебінен отандық автоөнеркәсіпті қолдау мақсатында компания былтыр шамамен 87 млрд теңге (191 млн доллар) жұмсағанын көруге болады. Бірақ әр автоқұрастырушыға қанша төлегені құжатта нақтыланбаған. Импорттаушылардан жиналған утиль алымы туралы да сөз жоқ.