Президент тапсырмасынан кейін утильдік алым жинауға жауапты болған мемлекеттік оператор «Жасыл Даму» АҚ бүгін жұмысын бастады. Kolesa.kz-ке Экология, геология және табиғи ресурстар министрлігі хабарлағандай, компания 24 қаңтарда алым жинауды бастады. Төлем ұйымның жаңа банк реквизиттері арқылы қабылданады.
Қазірше автокөлік, ауылшаруашылық техникасы және автокомпонент үшін бұрынғы бағам бойынша утильдік алым жиналады. Оның жаңа мөлшерін қазір жұмыс тобы талқылап жатыр, нәтижесі ақпанда белгілі болады.
Экология министрлігі мамандандырылған ХҚКО-да көлікті тіркеуге қоярда утилизациялық алымның төленгенін қалай анықтайтынын айтқан жоқ. Бұрын орталық мамандары «ӨКМ операторының» деректер базасынан тексеретін.
«Азаматтарға арналған үкімет» мамандары бізге база «Жасыл Дамудың» деректер базасымен әлі сәйкестенбегенін хабарлады. Қазір осы бағытта жұмыс жүріп жатыр, бірақ утильдік алымның төленгенін ақпанға дейін тексеру мүмкін емес. Сондықтан әзірше жаңа жыл алдында алым сомасы төленген машиналар ғана бастапқы есепке қойылады.
Комментариев: 0