Тынық мұхитта автотасығыш өртенді

Тынық мұхитта Zodiac Maritime компаниясына тиесілі Morning Midas кемесі отқа оранды. Қытайдан Мексикаға аттанған ролкердің бортындағы 3000 автомобильдің 800-і электромобиль болған.

Reuters хабарлағандай, электрокарлар тұрған палубада өрт шыққан. 22 адамнан тұратын экипаж зардап шеккен жоқ, барлығы шығып үлгерді.

Автомобиль тиеген кеме алғаш рет өртеніп отырған жоқ. Мысалы, 2023 жылдың 24 шілдесінде Нидерланд жағалауында Fremantle Highway ролкері өртенген еді, ол да қарапайым машиналармен қатар электромобиль тасымалдап бара жатқан. Өртке электромобиль себеп болған. Сол кезде кеме аман қалып, құтқарушылар жағаға жеткізді. 2022 жылы Атлант мұхитында, Азор аралдарынан 400 шақырым жерде Felicity Ace өртеніп, суға батып кеткен. Кемеде Volkswagen AG-дің 4000 көлігі болған, соның ішінде Porsche, Bentley, Audi және Lamborghini маркалы модельдер бар еді.