Қытайда Avatr 06 отқа оранды

CarNewsChina хабарлағандай, Қытайдың Фуцзянь провинциясында ірі апат болды. Audi, BMW, Mazda және Aion модельдері (7 автомобиль) тілсіз жау құрсауында қалды. Өрттің шығуына электрлі Avatr 06 себеп болған. Иесі электрокарды биыл тамыздың аяғында сатып алыпты.

Басылым көлік иесінің мәліметіне сүйеніп, Avatr 06 бар болғаны 1066 км жүрген деп жазды.

Бұған нақты не себеп болғаны әзірге белгісіз. Өндіруші оқиғадан хабардар, бірақ әлі ресми мәлімдеме жасамады, тергеу жүргізіп жатқан болса керек.

Алдын ала мәлімет бойынша өрт алдыңғы жолаушы орындығы жақтан басталған. Жалын шарпымай тұрып Avatr 06-ның салонында ауа температурасы 76 °C-қа жетті. Өрт шығуына көліктің күштік электроникасындағы ақау емес, салонда қалған гаджеттің қатты қызуы себеп болды деген болжам бар.

Avatr 06 CATL-дың 72.88 кВт·сағ литий-темір-фосфатты аккумуляторымен жабдықталады және 800 вольттық архитектураға негізделген. Қуаттаусыз 650 шақырым еңсере алады. Changan мен CATL бірлесіп құрған Avatr маркасы 06 моделін Қытайда биыл сәуірде сата бастады. Сарапшылардың мәліметінше 24 мыңнан астам машина өз иесін тапқан, оның ішінде толық электрлі және гибрид нұсқалар бар.