Toyota 2024 жылы V6 (V35A-FTS) қозғалтқышынан ақау шыққан 44 мың Tundra-ны сервиске шақырған, кейін кемшілігі бар көлік саны 250 мыңға жуықтады. Салдарынан Америкадағы халықтың көңіліне күдік ұялап, пикаптың беделі түсіп кетті деп жазды Carscoops.
Осы жолы жанжалға брендтің Хантсвилл қаласындағы мотор жасайтын зауыты себеп болды. Бұл кәсіпорын Сан-Антониодағы «тундра» құрастыратын әріптестеріне V6 жеткізеді. Жабдықты жонғылағанда және алюминий цилиндр блоктарын тескенде пайда болатын металл жоңқасы, нақты айтқанда, оның өте ұсақ бөлшектері жасырын май каналдарының ішінде қалып қойып, механизмді іштей кеміреді екен. Инженерлердің иінді біліктің негізгі мойынтірегіне онша берік емес құрылым қолдануы жағдайды тіпті ушықтырып жіберген, соның кесірінен торап майдағы титтей қоқысты сезіп қояды.
Салдарынан 2020 жылдары шыққан Tundra иелері мотор тарсылдап, діріл сезіледі және қуаты аяқ астынан кеміп кетеді, электроника да істен шығып, агрегат тас болып қатып қалады деп шағымданды. Жүргізуші эвакуатор шақырып, дилерге барып, моторды ауыстырам деп әуреге түседі.
Марканың жергілікті реттеуші органға жолдаған ресми есебінде Алабамадағы зауытты тексерген соң қатаң реформа енгіздік, жабдықты құрастырмай тұрып оның тазалығын көп сатылы жүйемен қадағалаймыз деп жазылған. V6-ны жақсарту үшін негізгі мойынтыректің құрылымын анағұрлым берік түріне ауыстырыпты. Tundra i-Force Max гибридінде мұндай кемшілік жоқ сияқты, себебі кампанияға қатыспады.
Комментариев: 0