Toyota Probox универсалы Land Cruiser-ге айналды

Кейінгі кезде Жапониядағы ательелер әртүрлі машинаға арнап тюнинг-пакет шығарып жүр. Олар автомобильдің сырт келбетін жергілікті немесе Американың классикалық модельдеріне ұқсатып жасайды. Мұндай жинақ сұранысқа ие. Мысалы, Mitsuoka Buddy деп аталатын RAV4-тің өзгерген нұсқасы үшін кезек бірнеше жылға созылған.

Енді тюнерлер Toyota-ның ең арзан модельдерінің бірі — Probox универсалын әрледі. Қазір бұл машинаның бағасы Жапонияда 1 918 400 иеннен (5.8 млн теңге) басталады.

Goosfam компаниясы Probox үшін Urban Classic және LifeStyle Retro деп аталатын екі пакет әзірледі. Автомобильдің алдыңғы бөлігінде бампер, қанат, капот, радиатор торы және фарасы ауысады. Сонда универсал классикалық Land Cruiser 60-ты еске салады. Хромдалған немесе қара түсті нұсқасы да бар.

Базалық жинақтың құны — 660 000 иен (2 млн теңге). Клиент шанақ панельдері орнатылған, жаңа дискімен, жолсыз жерде жүретін шинамен жабдықталған және Toyota Land Cruiser палитрасындағы сегіз түстің біріне боялған дайын көлікке тапсырыс бере алады. Мұндай Probox-тың құны 2 980 000 иеннен (9 млн теңге) асады.

Goosfam мамандары автомобильдің техникасына тиіспейді. Ол 1.5 литрлік бензинді қозғалтқышпен немесе соған негізделген гибрид жүйемен жабдықталады. Толық жетекті түрленімін де алуға болады.