Toyota Crown-ның бес есікті «драйверлік» нұсқасын компания мамырда таныстырды, бірақ ол кезде техникалық сипаттамасын ашып айтпаған еді. Жақында марка Жапонияда автомобильді саудаға шығарып, кей мәліметті бөлісті. Crown Sport бір ғана комплектацияда сатылады. Бағасы — 5.9 млн иен (19 млн теңге).
Toyota бес есікті модельді жол талғамайтын көлікке тән имиджде жасап, кроссовер ретінде ұсынады. Бірақ клиренсі небәрі 160 миллиметр, 19 дюймдік дөңгелек дискілері де (қосымша ақы төлесе 21 дюймдік дөңгелек орнатып береді) жолсызға арналмағандай көрінеді.
Crown Sport-тың толық жетекті және артқы дөңгелектерін электромотор (54 а. к., 121 Нм) айналдыратын гибрид түрі шығады. Капот астында 2.5 литрлік атмосфералы қозғалтқыш (186 а. к., 221 Нм) тұрады, ал вариаторға тағы бір электромотор (120 а.к., 202 Нм) қосады. Нәтижесінде жүйенің қуаты небәрі 234 ат күшіне теңеседі. Динамикалық сипаттамасы әзірге белгісіз.
Шассиінің өзгеше баптауы мен топтамадағы басқа көліктердікінен жалпақ дөңгелек жолтабаны кросс-хетчке күмәнді драйверлік сипат береді. Бұдан бөлек басқарылатын артқы дөңгелектер және ось арасындағы тарту күшін үлестіретін ақылды жүйе орнатады. Айналу моменті 100:0-ден 20:80-ге дейін өзгеріп отырады. Машина электр күшімен де қозғала алады.
Желтоқсанда Toyota Crown Sport-тың басқа гибрид құрылыммен жабдықталған модификациясы шығады. Оның қозғалтқышы қуатты, батареясы үлкен және тұрмыстық желі көмегімен қуаттау мүмкіндігі болады. Компания 2023-2024 жылдары бес метрлік седан мен ірі универсал өндірісін қолға алады.
Комментариев: 0