Биыл қыркүйекте Қазақстандағы автоқұрастыру зауыттары коммерциялық техниканы қоса есептегенде 13 021 автомобиль шығарды. Бұл былтыр қыркүйектегі көрсеткіштен (11 316 дана) едәуір жоғары.
ҚР Ұлттық статистика бюросы мұның басым көбі жеңіл автомобиль (11 642 дана) екенін хабарлады. Күздің алғашқы айында 748 жүк көлігі, 293 автобус, 290 жартылай тіркеме мен тіркеме және 48 арнайы техника жарық көрді.
2025 жылғы үш тоқсанда елдегі зауыттар 109 223 автомобиль құрастырды. Бұл 2024 жылғы сәйкес кезеңімен салыстырғанда 17 % жоғары көрсеткіш. Бірақ бұл Қазақстан автоөнеркәсіпіндегі ең үздік нәтиже емес. 2023 жылғы қаңтар мен қыркүйек арасында елде 110 050 техника шыққан.
Қазақстан автомобиль одағы (ҚАО) хабарлағандай, биыл тоғыз айда Қостанайдағы Allur зауыты ең көп көлік құрастырды. Кәсіпорын 61 501 дана техника шығарған, бұл былтырғы көрсеткіштен 11.6 % көп. Рейтингте екінші орында Astana Motors құрамына кіретін Алматыдағы үш зауыт тұр. Hyundai Trans Kazakhstan, Hyundai Trans Almaty және жақында ашылған Astana Motors Manufacturing Kazakhstan қазір Chery, Changan, Haval және Tank сияқты бірнеше Қытай брендінің өнімдерін құрастырып жатыр. Жыл басынан бері олар 42 684 жеңіл және коммерциялық автомобиль шығарды (+44.3 %).
Семейдегі СемАЗ бен Daewoo Bus Kazakhstan зауыты 3442 коммерциялық техника құрастырып, рейтингте үшінші орын алды. Одан кейін Қарағандыдағы QazTehna зауыты (1371 дана) мен Көкшетаудағы КАМАЗ-Инжиниринг зауыты (932) жайғасқан.
Биылғы тоғыз айдағы ең танымал бес марка: Hyundai (38 968 дана), Chevrolet (21 566), Kia (19 060), Jetour (10 180) және JAC (8 483).
Ал ең көп өткен модель — Chevrolet Cobalt (17 706 дана). Екінші орында Hyundai Tucson (15 416 дана) тұр. Үздік бестікке Kia Sportage (8918), Hyundai Mufasa (6416) және Hyundai Elantra (5654) енді.
Комментариев: 0