«Тесланың» апатқа ұшырауы таңғаларлық жағдай емес, өйткені марка көліктері әлем бойынша көптеп сатылып жатыр. Алайда сәуірде Техаста болған қайғылы оқиға жұртты шошытып, автопилот қосып қозғалудың қауіпсіздігіне күмән тудырды. Сол кезде ағашқа соғылып, түгі қалмай жанып кеткен Tesla Model S ішінен екі мәйіт табылды және апат болғанда рөлде ешкім отырмағаны анықталды.
Зерттеу есебінде көліктегі адамдардың бірінің қанында алкоголь мөлшері шамадан тыс жоғары болғаны жазылған. Бірақ ол желөкпе жас емес, 59 жастағы дәрігер екен. Ал қасындағы кісі 69 жаста болған.
Жақын маңдағы бейнебақылау камерасына екі тұрғынның алдыңғы орындарға жайғасқаны түсіпті, бірақ біреуінің денесі артқы орындықтан табылды әрі қатты соққыдан және термиялық жарақаттан қаза болғаны белгілі болды.
Көлік қалдықтарын тексерген мамандар «тесла» ағашқа соғылғанда автономды қозғалыс режимі қосулы болған деп болжады. Кейін Ұлттық көліктегі қауіпсіздік кеңесінің (NTSB) сарапшылары мұны жоққа шығарып, апат тіркелген жолда жолақ таңбасы болмағандықтан, Autosteer жүйесі қосылмайтынын айтты. Круиз-бақылау функциясы іске қосылуы да мүмкін, бірақ бұл жағдайда жүргізуші міндетті түрде өз орнында отыруға тиіс еді. Шамасы, апаттан кейін жүргізуші артқы есіктен шықпақ болса керек, алайда есік бұғатталып қалған. Енді тергеудің ресми қорытындысын күтеміз.
Комментариев: 0