Tesla Cybertruck-тың интерьер дизайнын толық аяқтаған сияқты. Cybertruck Owners Club форумында жарияланған суреттерден компания бұған дейін инвесторларға таныстырған прототиптің бірнеше элементін байқауға болады. Электрокар бұған дейін болмаған құрылғылармен жабдықталады.
Ең арзан модельдің салонында тіктөртбұрышты алдыңғы панель, рөл, үлкен экран және шынтақ тіреуіш бар. Cybertruck-тың ішкі жабдықтары осымен шектелген. Электропикапқа беріліс селекторын да, батырмалар жиынтығын да орнатпағаны суретте тайға таңба басқандай көрініп тұр. Ауыстырғыш тек рөлде ғана бар, рөл астында иінтірек те жоқ екен, сондықтан бұрылыс көрсеткішін сонымен басқарады.
Электромобиль рөлі сопақ, қыры бар, көзге оғаш көрінеді. Бұл марка жасаған жаңа дүние болып тұр. Бұған дейінгі көліктерге компания дәстүрлі домалақ немесе ұшақ штурвалына ұқсас рөл орнататын. Сол арқылы Tesla пикаптың футуристік сипаты мен компанияның технологиялық жетістігін айқындай түскісі келген сияқты.
Алдыңғы әйнек пен алдыңғы панель арасында үлкен бос кеңістік бар. Tesla ол жерге не қоятыны әзірше белгісіз.
Күштік құрылым ортаңғы үлкен экран арқылы басқарылатын тәрізді. Бұны бренд басқа модельдеріне де пайдаланған. Пикапта аспаптар панелі жоқ, сол себепті машина туралы мәлімет экранға шығады.
Tesla Cybertruck прототипі 2019 жылы шыққан, содан бері компания автоның көптеп өндіруге тырысып жүр. Қазір Техастағы «Гигафабрикада» пикап құрастыратын алаң құрылысы жүріп жатыр. Серия алды топтама конвейерден жылдың соңында түседі. Бірақ Илон Масктың фирмасы Cybertruck-ты әлі ресми таныстырған жоқ.
Комментариев: 0