Хан Тәңірі көшесінің тұрғындары асфальтты 30 жыл күткен, осы айдың басында жол жөндеушілер олардың арманын орындады, бірақ халықтың қуанышы ұзаққа созылмады деп хабарлайды ktk.kz. Үш күннен кейін жабын үгітіліп, шашыла бастапты. Асфальтты небәрі 4 см қалдыңдықта төсеп, астына құм мен қиыршық тастан тұратын қоспа құя салған. Бұндай жол жүк көліктері былай тұрсын, жеңіл көлік салмағын да көтере алмайды.
«Көрші Ақбастау көшесінде асфальт қалың. Ал Хан Тәңірінде ол үш есе жұқа. Біз қолмен алсақ болды үгітіліп жатыр. Фура емес, тіпті жеңіл көлік жүрген соң бірден ашылып жатыр», — деді наразы тұрғындар.
Тұрғындардың шағымын тыңдаған Талдықорған әкімдігі жол әлі қолданысқа берілмегенін айтты.
«Бұл көшеге ешқандай қаржы төленген жоқ. Қала тұрғындарына осылай басу айтқым келіп тұр. Неге? Себебі бұл обьектінің кепіл мерзімі екі жыл. Осы уақыт ішінде ақау шықса, «Марлен-А» ЖШС оны өз қаражаты есебінен жөндейді», — деді Талдықорған қаласы Жолаушылар көлігі және автомобиль жолдары басқармасының бас маманы Арман Укунов. Ол мердігер компания көшені 15 қазанға дейін қалыпқа келтіреді деді.
Бұндай жағдай Талдықорғанда ғана болған жоқ. Мысалы, бір ай бұрын Маңғыстауда тұрғындар асфальтты геоторға төседі деп шу шығарған еді. Әлеуметтік желіде осыған ұқсас жол-құрылысының сорақылықтары жиі көзге түсіп жүр.
Комментариев: 0